ملکی معاملات میں دخل اندازی نیپال نے بھارت سے اپنے سفیر کو واپس بلا لیا

بھارت پر الزام ہے وہ ماؤنواز نیپالی اپوزیشن کی حمایت کر رہا ہے، مشیر نیپالی وزیر اعظم

AFP May 08, 2016

نئی دہلی میں تعینات نیپالی سفیردیپ کمارماؤ نواز اپوزیشن جماعت کی حمایت جاری رکھے ہوئے تھے جوحکومت گراناچاہتی ہے، اے ایف پی، حکومت کی تبدیلی کی تحریک میںاپادھیائے کا اہم کردار ہے، ذرائع۔ فوٹو: فائل

نیپالی حکومت نے ماؤنوازاپوزیشن کی حمایت کرنے پربھارت میں تعینات اپنا سفیرواپس بلالیاہے جبکہ ملکی معاملات میں ہمسایہ ملک بھارت کی 'دخل اندازی' کی وجہ سے نیپالی صدر نے اپنا نئی دہلی کا دورہ بھی منسوخ کردیا ہے۔

اس اقدام کے بعد دونوں ملکوں کے مابین کشیدگی میں مزیداضافہ ہوسکتا ہے۔ اطلاعات کے مطابق نئی دہلی میں تعینات نیپالی سفیر دیپ کماراپادھیائے کوجمعہ کی رات واپس ملک بلا لیا گیا تھا اوراس کی وجہ مبینہ طورپران کی طرف سے نیپالی اپوزیشن کا ساتھ دینا ہے جسے بھارتی حکومت کی حمایت بھی حاصل ہے۔ اے ایف پی نے اپنے ذرائع کا حوالہ دیتے ہوئے لکھا ہے کہ دیپ کمار نیپال کی ماؤ نواز اپوزیشن جماعت کی حمایت جاری رکھے ہوئے تھے اور یہ پارٹی وزیراعظم کے پی شرما اولی کی حکومت گراناچاہتی ہے۔

گزشتہ ہفتے نیپالی پارلیمان میں اس وقت افراتفری پھیل گئی تھی جب حکومتی اتحاد میں شامل ماؤنواز گروپ نے دھمکی دی تھی کہ وہ اتحاد سے الگ ہو جائیں گے تا کہ وزیراعظم کو ان کے عہدے سے ہٹایاجا سکے۔ بتایا گیا ہے کہ اس اقدام کے پیچھے مبینہ طور پر بھارت کا ہاتھ تھا۔ تاہم اس اعلان کے بعد ماؤ نواز اپوزیشن نے حکومت کی حمایت جاری رکھنے کا اعلان کیا تھا تاکہ جمہوری نظام چلتا رہے۔

ایک حکومتی عہدے دار کا نام ظاہر نہ کرنے کی شرط پر کہنا تھاکہ دیپ کمار اپادھیائے کا نیپالی کانگریس میں کافی اثرورسوخ ہے اور خیال کیا جارہاہے کہ حکومت کی تبدیلی کی تحریک میںان کا اہم کردار ہے۔ یہی وجہ ہے کہ انھیں واپس بلا لیا گیا ہے۔ اپادھیائے کو اپریل 2015 میں کانگریس جماعت کی قیادت والی حکومت کی طرف سے بھارت میں سفیر مقرر کیا گیا تھا۔

دوسری جانب نیپالی وزیراعظم کے مشیر برائے خارجہ امور گوپال کھنال نے یہ بتانے سے گریز کیا ہے کہ بھارت میں تعینات سفیر کو کیوں واپس بلایا گیا ہے، انھوں نے کہاکہ ایک حکومت کو حق حاصل ہے کہ ملک کی صحیح نمائندگی نہ کرنے کی وجہ سے وہ کسی بھی سفیر کو واپس بلا لے۔ بھارت اور نیپال کے مابین گزشتہ کئی ماہ سے تعلقات کشیدہ چلے آ رہے ہیں اور اس تازہ پیش رفت کا نتیجہ یہ نکلا ہے کہ خاتون صدر بدھیہ دیوی بھنڈاری کا آئندہ پیرکے روز سے شروع ہونے والا بھارت کادورہ بھی منسوخ کردیاگیاہے۔ ان پڑوسی ممالک کے مابین پانی کی تقسیم کا تنازع ہمیشہ سے عدم اعتماد اور دوستانہ ماحول کے فقدان کا سبب بنارہاہے۔