اداکارہ میرا نے فلم ’’ہوٹل‘‘ میں اپنی اداکاری پرتعریفوں کے پل باندھ دیئے

فلم انڈسٹری کی بہتری کے لیے لالی ووڈ اور بالی ووڈ کو مل کر کام کرناچاہیئے، میرا کا مشورہ فوٹو:ایکسپریس نیوز

---

گلابی انگلش سے شہرت حاصل کرنے والی اداکارہ میرا نے اپنی فلم ''ہوٹل'' کی نمائش کی تاریخ کا اعلان کرنے کے لیے بلائی گئی پریس کانفرنس میں اپنی ہی تعریفوں کے پل باندھ دیئے۔

لاہور پریس کلب میں لالی ووڈ اداکارہ میرا نے اپنی والدہ کے ہمراہ پریس کانفرنس کی جس میں انہوں نے اپنی فلم ''ہوٹل'' کی نمائش کا اعلان کیا جب کہ اداکارہ پریس کانفرنس کے دروان اپنی ہی تعریفیں کرتی رہیں جہاں ان کی زبان انگریزی کے لفظ بولتے ہوئے کئی بار پھسل بھی گئی۔

میرا نے فلم کی کامیابی سے متعلق بڑے بڑے دعوے کرتے ہوئے اسے اپنی زندگی کی بہترین فلم قرار دیا جب کہ اداکارہ نے پریس کانفرنس کے دوران لالی ووڈ اور بالی ووڈ انڈسٹری کو اپنے قیمتی مشوروں سے بھی نوازا۔ میرا کا کہنا تھا کہ ہماری فلم انڈسٹری بھارت کامقابلہ کرنےکی صلاحيت نہيں رکھتی اس لیے لالی ووڈ کو بہتری کے لیے بالی ووڈ کے ساتھ مل کر کام کرناچاہیے۔

واضح رہے کہ اداکارہ میرا کی فلم ''ہوٹل'' 13 مئی کو نمائش کے لیے پیش کی جائے گی۔