رنبیر کپور نے صحافی کا موبائل فون چھین لیا

بالی ووڈ اداکار نے پیچھا کرنے پر صحافی کا موبائل چھینا اور آئندہ پیچھا نہ کرنے کی یقین دہانی پر واپس کیا۔ فوٹو؛ فائل

---

بالی ووڈ کے چاکلیٹی ہیرو رنبیر کپور اپنا پیچھا کرنے پر صحافی پر آگ بگولہ ہوگئے اور ان کا موبائل فون چھین لیا۔

بالی ووڈ میں چاکلیٹی ہیرو کے نام سے مشہور اداکار رنبیر کپور فلم نگری کے صف اول کے اداکار ہیں جب کہ چاکلیٹی ہیرو اپنی فلموں کی یکے بعد دیگرے ناکامیوں اور اپنی سابقہ محبوبہ کترینہ کیف کی جانب سے فلم ''جگا جاسوس'' کی دوبارہ عکس بندی پر شدید پریشان ہیں جس کی وجہ سے اب اپنے غصے پر قابو رکھنا ان کے لیے مشکل ہوتا جارہا ہے یہی وجہ ہے کہ وہ گزشتہ روز ایک صحافی سے الجھ پڑے۔

میڈیا رپورٹس کے مطابق گزشتہ روز رنبیر کپور اپنے دوست کے گھر دعوت کے لیے نکلے تو صحافی کی جانب سے پیچھا کرنے پر آگ بگولہ ہوگئے اور خوب جھاڑ پلائی بلکہ چاکلیٹی ہیرو نے یہیں بس نہیں کی صحافی کا موبائل فون چھین کر دعوت میں چلے گئے جس پر صحافی کو 4 گھنٹے انتظار کرنا پڑا جب کہ اداکار نے رات گئے دعوت سے واپسی پر ایک بار پھر صحافی کو آڑے ہاتھوں لیا اور آئندہ پیچھا نہ کرنے کے وعدے پر موبائل فون واپس کیا۔

واضح رہے کہ بالی ووڈ اداکار رنبیر کپور اپنی فلموں''جگا جاسوس'' اور ''اے دل ہے مشکل'' کی شوٹنگ میں مصروف ہیں۔