کرکٹرز نے ٹرینر کے جانبدارانہ رویے کی شکایت کردی

 مصباح کی ٹیسٹ کیلیے رپورٹ ، ماہر نفسیات نے پلیئرز کودباؤ جھیلنے کا سبق پڑھا دیا ۔ فوٹو؛ اے ایف پی/ فائل

---

کرکٹرز نے فٹنس ٹیسٹ میں ٹرینر کے جانبدارانہ رویے کی شکایت کردی، ان کا کہنا تھا کہ اظہر علی ،وہاب ریاض اور سرفراز احمد سمیت چند کھلاڑیوں سے نرمی برتی گئی، دیگر کو سخت ٹریننگ کرائی جارہی ہے، عمرے کی ادائیگی کے بعد کپتان مصباح الحق نے بھی رپورٹ کردی، ماہر نفسیات نے لیکچر میں پلیئرز کو دباؤ برداشت کرنے کا سبق پڑھایا۔

تفصیلات کے مطابق پی سی بی کی جانب سے سینٹرل کنٹریکٹ میں شامل کرکٹرز کے فٹنس ٹیسٹ لینے کا سلسلہ اتوار سے نیشنل کرکٹ اکیڈمی میں شروع ہوااور 12 مئی تک جاری رہے گا، گذشتہ روز احمد شہزاد، سعید اجمل، عمر اکمل اور وہاب ریاض سمیت کئی کھلاڑیوں کے پانچوں ٹیسٹ سیشنز مکمل ہوگئے، منگل کو بیشترکی فٹنس جانچ مکمل ہوجائے گی، اگلے مرحلے میں جونیئرز پر توجہ دیتے ہوئے ڈیٹا مرتب کرلیا جائے گا، عمرے کی ادئیگی کے بعد قومی ٹیسٹ ٹیم کے کپتان مصباح الحق نے بھی رپورٹ کردی ہے،ذرائع کے مطابق این سی اے میں سیشنز کے دوران کئی کھلاڑی فٹنس ٹیسٹ لینے والی ٹیم اور ٹرینر گرانٹ لیوڈن کے رویے سے ناخوش دکھائی دیے۔

انھوں نے عملے کی شکایت کرتے ہوئے کہاکہ قومی ون ڈے ٹیم کے کپتان اظہر علی، فاسٹ بولر وہاب ریاض اور ٹی 20 قائد سرفراز احمد سمیت چند پلیئرز سے نرمی برتی جبکہ دیگر سے سختی کے ساتھ پیش آیا گیا، شدید گرمی میں سخت ٹریننگ کرائی جارہی ہے۔ دوسری جانب ماہر نفسیات اسد رضوی نے فٹنس کیمپ میں شریک کرکٹرز کو لیکچر دیا، انھوں نے کھلاڑیوں کو انٹرنیشنل مقابلوں کے دوران دباؤ میں بہتر پرفارم کرنے کا سبق پڑھایا، اسد رضوی نے کہا کہ اعصاب قابو میں رکھتے ہوئے مشکل حالات میں بہتر صلاحیتوں کا مظاہرہ کرنے سے ہی کامیابی حاصل ہوسکتی ہے، لیکچر میں موجود کرکٹرز نے ان سے سوالات بھی کیے۔