وزیراعظم نے 7سوالات کا تسلی بخش جواب نہ دیا تو ایوان میں بھرپور احتجاج کیا جائے گا متحدہ اپوزیشن

اپوزيشن جماعتوں نے قومی اسمبلی كے اجلاس ميں وزيراعظم كی جانب سے پاناما ليكس سے متعلق معاملات بارے اپوزيشن كے سوالنامے كا جواب دينے كيلئے خطاب كے موقع پر حكمت عملی تيار كرلی جس میں متحدہ اپوزیشن کا کہنا ہے کہ اگر وزیراعظم نے 7 سوالات کا تسلی بخش جواب نہ دیا تو ایوان میں بھرپور احتجاج کیا جائے گا۔



ایکسپریس نیوزکے مطابق پیپلزپارٹی کے رہنما اعتزاز احسن کی رہائش گاہ پر اپوزیشن جماعتوں کا اجلاس ہوا جس میں تحریک انصاف، ایم کیو ایم، پیپلزپارٹی، عوامی نیشنل پارٹی، مسلم لیگ عوامی اور دیگر کے رہنماؤں نے شرکت کی۔ اس موقع پر متحدہ اپوزیشن کی جانب سے فیصلہ کیا گیا کہ وزیراعظم کو کل ہونے والے اجلاس میں اپوزیشن کے سوالات پر بولنے کا پورا وقت دیا جائے گا اور اگر وزیراعظم نے اپوزیشن کے سوالات پر تسلی بخش جواب نہ دیا تو بھرپور احتجاج کیا جائے گا۔




اجلاس کے دوران اعتزاز احسن کا کہنا تھا کہ ہم چاہتے ہیں کہ وزیراعظم پاناما لیکس پراپنا نام کلئیر کریں کیوں کہ پاناما لیکس میں وزیراعظم کا نام آیا ہے اور اس سے ملک کی بہت بدنامی ہورہی ہے، ہم چاہتے ہیں کہ وزیراعظم تمام الزامات کا جواب دیں جس کے لئے اپوزیشن نے ان کی آسانی کے لئے 7 سوال بھجوا دیئے ہیں۔



دوسری جانب اپوزیشن اتحاد کا 3 رکنی وفد جس میں شیریں مزاری، طارق بشیر چیمہ اوراعجازجاکھرانی آج اسپیکرقومی اسمبلی کے چیمبر میں جاکر وزیراعظم کے ایوان میں آمد کے بعد اپوزیشن کو بات کا موقع دینے سے متعلق امور پربات کرے گا۔