سی پیک کیلئے سلامتی کی ضمانت دینے کو تیار ہیں آرمی چیف کی چینی وزیراعظم کو یقین دہانی

دو طرفہ تعاون کے فروغ کے لیے محفوظ ماحول قائم کرنے پر بھی تیار ہیں- آرمی چیف فوٹو؛ فائل

---

آرمی چیف جنرل راحیل شریف کا کہنا ہے کہ پاک فوج سی پیک کے لیے سلامتی کی ضمانت دینے کے لیے تیار ہے اور دو طرفہ تعاون کے فروغ کے لیے محفوظ ماحول قائم کرنے پر بھی تیار ہے۔

ایکسپریس نیوز کے مطابق آرمی چیف جنرل راحیل شریف نے چینی وزیراعظم لی کی جیانگ سے ملاقات کی اس دوران چینی وزیراعظم نے کہا کہ اقتصادی راہداری منصوبہ دونوں ممالک کے درمیان عملی تعاون کا مظہر ہے جب کہ قریبی تعلقات اقتصادی شعبے میں خصوصی تعاون کی ضمانت ہیں اور اس منصوبے سے خطے میں ترقی او ر استحکام آئے گا۔



آرمی چیف جنرل راحیل شریف کا کہنا تھا کہ پاک فوج سی پیک کے لیے سلامتی کی ضمانت دینے کے لیے راضی ہے اور دو طرفہ تعاون کے فروغ کے لیے محفوظ ماحول قائم کرنے پر بھی تیار ہیں جب کہ دونوں ممالک کی افواج میں دوستانہ تعلقات سے پاک چین دوستی گہری ہورہی ہے۔

اس سے قبل ترجمان پاک فوج لیفٹیننٹ جنرل عاصم سلیم باجوہ نے ٹوئٹر پر پیغام میں کہا کہ آرمی چیف جنرل راحیل شریف 2 روزہ دورے پر چین میں موجود ہیں جہاں آرمی ہیڈکوارٹر میں انہیں گارڈ آف آنر بھی پیش کیا گیا۔ جنرل راحیل شریف چین کی اعلی سیاسی شخصیات کے علاوہ فوج کی دیگر اعلی قیادت سے بھی ملاقاتیں کریں گے۔

Mtng;Measures to further improve mil to mil coop,exponentially enhanced training exchanges,def tech&Int sharing,security of CPEC discussed-3

— Gen(R) Asim Saleem Bajwa (@AsimBajwaISPR) May 16, 2016

ترجمان پاک فوج کے مطابق دونوں ممالک کے عسکری سربراہان کے درمیان پاک چین اقتصادی راہداری منصوبے کی سیکیورٹی کے علاوہ دونوں افواج کے درمیان تعاون بڑھانے، مختلف تیکنیک اور انٹیلی جنس معلومات کے تبادلے پر بھی تبادلہ خیال کیا گیا۔