سلطان جوہر ہاکی پاکستان کا چوتھی پوزیشن پر اختتام

دوسرے سلطان جوہر بارو کپ میں پاکستان نے چوتھی پوزیشن کے ساتھ اختتام کیا۔

گرین شرٹس کو تیسری پوزیشن کے مقابلے میں آسٹریلیا نے سخت مقابلے کے بعد 3-2 سے شکست دے دی، جرمنی نے بھارت کوپچھاڑ کر ٹائٹل جیت لیا۔ موصولہ اطلاعات کے مطابق سلطان جوہر کپ ہاکی ٹورنامنٹ میں پاکستان کی جونیئر ہاکی ٹیم نے تیسری پوزیشن کے مقابلے میں آسٹریلیا کا بھرپور مقابلہ کیا۔


تاہم کامیابی مقدر نہ بن سکی، 0-2 کے خسارے میں جانے والی قومی ٹیم نے مقررہ وقت میں مقابلہ برابر کر کے اضافی وقت میں کھیل کو پہنچایا لیکن گولڈن گول پر کینگروز نے فتح اپنے نام کرلی، کھیل کے پہلے ہاف میں آسٹریلوی پلیئرز نے اپنی بالادستی قائم رکھی، گذشتہ برس ایونٹ میں رنر اپ رہنے والی آسٹریلوی ٹیم نے کھیل کے نویں منٹ میں کیسی ہیمونڈ کے گول کی بدولت برتری حاصل کی، جو پاکستانی دفاعی حصارکوتوڑتے ہوئے خود گیند لیکرسیمی سرکل تک گئے جہاں ان کے سامنے صرف گول کیپر مظہر عباس تھے، جسے انھوں نے باآسانی چکمہ دے دیا۔

دو منٹ بعد حریف کپتان ڈیلن وودر اسپون نے بائیں جانب سے گیند کو سیمی سرکل تک پہنچاتے ہوئے ایک مرتبہ پھر مظہر کو بے بس کردیا، پاکستان کے پاس خسارہ کم کرنے کا بہترین موقع کھیل کے 23ویں منٹ میں آیا، جب ٹیم کو پہلا پنالٹی کارنر ملا، لیکن اس سے پاکستانی پلیئرز خاطرخواہ فائدہ نہیں اٹھاسکے، کھیل کے دوسرے ہاف میں پاکستانی ٹیم نے قدرے بہتر کھیل پیش کیا ، 49ویں منٹ میں محمد عرفان نے گیند کو جال میں پہنچاکر ٹیم کو اعتماد دیا، مقررہ وقت کی فائنل وسل سے چار منٹ قبل رضوان علی نے دوسرا گول داغ کر آسٹریلیا کے اوسان خطا کردیے اور مقابلے کو اضافی وقت میں دھکیل دیا، اضافی ٹائم کے پہلے ہاف کے خاتمے سے دو منٹ قبل جیشان رندھاوا نے گولڈن گول بناکر آسٹریلیا کو وکٹری اسٹینڈ پر پہنچادیا۔

فائنل میں جرمنی نے بھارت کیخلاف 3-2 سے کامیابی حاصل کی، جرمنی کیلیے کھیل کا پہلا گول 11ویں منٹ میں ٹیم کوملنے والے پہلے پنالٹی کارنر پر جوناس گومول نے بنایا، 24ویں منٹ میں ستبیر سنگھ کے جوابی گول سے میچ برابر ہوگیا، جوشا دیلیربر نے جرمنی کیلیے دوسرا گول بنایا، فلورین ایڈرینز نے یورپی ٹیم کیلیے تیسرا گول اسکورکیا، کھیل ختم ہونے سے محض تین منٹ قبل آکاش دیپ نے بھارت کا خسارہ کم کیا،آخری پوزیشن کے مقابلے میں نیوزی لینڈ نے میزبان ملائیشیا کو اضافی وقت 2-1 سے ہرادیا۔