رائس ایکسپورٹرزکاایران میں دفاترکھولنے کااعلان

امید ہے کہ پاکستانی باسمتی چاول کی برآمدات 6 سے 7 لاکھ ٹن تک بڑھ سکتی ہے

APP May 17, 2016

امید ہے کہ پاکستانی باسمتی چاول کی برآمدات 6 سے 7 لاکھ ٹن تک بڑھ سکتی ہے فوٹو: فائل

رائس ایکسپورٹرز ایسوسی ایشن آف پاکستان (آر ای اے پی)کے سرپرست اعلیٰ عبد الرحیم جانو، چیئرمین چوہدری محمد شفیق اور سینئر وائس چیئرمین نعمان احمد شیخ نے کہا کہ ایران دنیا میں سب سے زیادہ باسمتی چاول درآمد کرنے والا ملک ہے، کچھ عرصہ قبل پاکستان کا ایران میں مارکیٹ شیئر سب سے زیادہ تھا مگر امریکی پابندیاں لگنے کے بعد اب پاکستان کا حصہ بالکل کم ہوگیا ہے جبکہ 2 سال سے پاکستانی چاول کی برآمدات شدید تنزلی کا شکار ہیں۔

اس صورتحال کو دیکھتے ہوئے ایسوسی ایشن نے اعلیٰ سطح کا تجارتی وفد چیئرمین چوہدری محمد شفیق کی قیادت میں ایران بھیجا، پاکستانی سفارت خانے کے تعاون سے اس وفد کو بڑی پذیرائی ملی اور ایران کے اعلیٰ حکومتی اداروں سے اہم ملاقاتیں اور چاول کے بڑے خریداروں سے بی ٹو بی ملاقاتیں بھی ہوئیں جس سے چاول کے اچھے آرڈر ملنے کا امکان ہے مگر ابھی تک پیمنٹ کے مسائل حل نہیں ہوئے ہیں۔

انھوں نے کہاکہ گزشتہ دنوں ایف پی سی سی آئی کے سیمینار میں نامور اور ممتاز بینکرز نے بتایا کہ ابھی تک اسٹیٹ بینک آف پاکستان کی طرف سے ایران کے ساتھ تجارت کرنے پر بینکنگ چینل کے مسائل حل نہیں ہوئے، رائس ایکسپورٹرز کے تجارتی وفد کے کامیاب دورے کے بعد ایسوسی ایشن کے ممبران وزارت تجارت اور حکومت پاکستان کی اجازت سے تہران اور مشہد میں اپنے دفاتر کھولیں گے جس سے امید ہے کہ پاکستانی باسمتی چاول کی برآمدات 6 سے 7 لاکھ ٹن تک بڑھ سکتی ہے اور پاکستان اپنا کھویا ہوا مارکیٹ شیئر دوبارہ حاصل کرنے میں کامیاب ہوجائے گا۔

اس سلسلے میں ایسوسی ایشن کے ممبران ایرانی درآمدکنندگان کو پاکستان آنے کی دعوت دیں گے تاکہ ایسوسی ایشن کے ممبران ایرانی امپورٹرز کے ساتھ کاروباری ملاقاتیں کر کے دونوں ممالک کے درمیان تجارتی تعلقات بڑھانے میںکردار ادا کرسکیں ۔ انھوں نے کہا کہ اس حوالے سے ایسوسی ایشن وزارت تجارت کو آن بورڈ لے گی اور ایسوسی ایشن کا وفد جلد ہی وزیر اعظم سے ملاقات کرکے چاول کی برآمدات بڑھانے کے لیے روڈ میپ اور اپنی تجاویز دے گا۔