نوازشریف سے ملاقات نہ کریں زرداری پر پارٹی کا دباؤ

آصف زرداری کی وزیراعظم نوازشریف سے ملاقات سے پارٹی کی بنیادکو نقصان پہنچے گا، پارٹی رہنماؤں کی رائے

نوید معراج May 25, 2016

مولانا فضل الرحمان نوازشریف اور آصف زرداری کے درمیان مصالحت کارکاکردار ادا کررہے ہیں فوٹو؛ فائل

پیپلز پارٹی کی سینئر قیادت سابق صدرآصف علی زرداری کو اس بات پرقائل کرنے کی کوشش کر رہی ہے کہ وہ وزیراعظم نوازشریف سے ملاقات نہ کریں کیونکہ اس سے پارٹی کو نقصان ہوگا۔

جے یو آئی ف کے سربراہ مولانا فضل الرحمان پانامہ لیکس کے معاملے پر نوازشریف اور آصف زرداری کے درمیان مصالحت کارکاکردار ادا کررہے ہیں اور ان دنوں لندن میں ہیں۔انھوں نے چیئرمین پیپلز پارٹی سے ملاقات بھی کی ہے اور انھیں وزیر اعظم سے ملاقات کیلیے منانے کی کوشش کی ہے تاہم زرداری ابھی تک اس ملاقات کیلیے راضی نہیں ہوئے۔

پیپلزپارٹی میں موجود ذرائع نے بتایاکہ سینئر پارٹی قیادت نے گزشتہ دو دنوں میں آصف زرداری کوبتادیاہے کہ انھیں وزیراعظم نوازشریف سے ملاقات نہیں کرنی چاہیے کیونکہ اس سے پارٹی کی بنیادکو نقصان پہنچے گا۔ قیادت کاموقف ہے کہ پانامہ لیکس پرجارحانہ موقف اپنانے اور نوازشریف کی مخالفت سے ہی پارٹی کی بنیاد اوپر اٹھنا شروع ہوئی ہے۔ابھی تک یہ واضح نہیں کہ مولانا فضل الرحمان کی ملاقات کے بعد آصف زرداری نوازشریف سے ملاقات کرتے ہیں یا پارٹی قیادت کی سنتے ہیں۔