قرآنِ مجید ایک مکمل ضابطۂ حیات

قرآن مجید ہی وہ الہامی کتاب ہے جس میں ہمارے تمام سوالات کے جوابات اور دینی و دنیاوی مسائل اور مشکلات کا حل موجود ہے۔

چوہدری محمد ریاض کھٹانہ May 27, 2016

دعا ہے کہ اﷲ تبارک و تعالیٰ کی ذات مبارکہ حضور پُرنور ﷺ کے صدقے ہمیں قرآن حکیم کو پڑھنے، سمجھنے اور اس پر مکمل عمل کرنے کی توفیق عطا فرمائے:فوٹو : فائل

قرآن مجید میں سورۃ البقرہ کی آیت نمبر 1اور 2 میں ارشاد ربانی ہے، ترجمہ '' الٰم، یہ کتاب ایسی ہے جس میں کوئی شبہ نہیں، راہ بتلانے والی ہے، خدا سے ڈرنے والوں کو۔''

قرآن حکیم میں سورۃ الجاثیہ کی آیت نمبر 11میں ارشاد ربانی ہے، ترجمہ '' قرآن سر تا سر ہدایت ہے۔'' سورۃ الحجر کی آیت نمبر 9 میں ارشاد ربانی ہے، ترجمہ ''بے شک ہم نے قرآن کو نازل کیا اور ہم ہی اس کے محافظ (اور نگہبان) ہیں۔'' قرآن پاک کی عظمت و شان اور جلال کا اندازہ ہمیں سورۃ الحشر کی آیت نمبر21 میں اس ارشاد ربانی سے بہ خوبی ہو جاتا ہے، ترجمہ '' اگر ہم اس قرآن کو کسی پہاڑ پر نازل کرتے تو (اے مخاطب) آپ اس کو دیکھتے کہ خدا کے خوف سے دب جاتا اور پھٹ جاتا اور یہ مثالیں ہم لوگوں کے لیے بیان کرتے ہیں کہ وہ سوچیں۔''

حضرت معاذ ؓ فرماتے ہیں کہ رسول اکرم ؐ نے فرمایا، جو شخص قرآن پڑھے اور جو احکامات اس میں ہیں، اس پر عمل کرے تو قیامت کے دن اس کے ماں باپ کو تاج پہنایا جائے گا، اس تاج کی روشنی دنیا کے آفتاب کی روشنی سے اچھی ہوگی۔ جب کہ یہ فرض کرلیا جائے کہ آفتاب تمہارے گھروں کے اندر روشن ہو پھر تم سمجھ سکتے ہو کہ جب ماں باپ کا یہ درجہ ہوگا تو اس شخص کا کیا درجہ ہوگا جس نے قرآن پاک پر عمل کیا۔

قرآن پاک کی ہر سورت اور ہر آیت معجزہ ہے اور اس کی حفاظت کا ذمہ اﷲ پاک نے خود اٹھایا ہے۔ عہد رسالت سے لے کر آج تک کوئی لمحہ کوئی ساعت ایسی نہیں بتلائی جا سکتی کہ جس میں ہزاروں اور لاکھوں حفاظ کرام موجود نہ رہے ہوں، ان حفاظ میں آج بھی مرد و زن سب ہی شامل ہیں۔ غور فرمائیے کہ آٹھ دس سال کا بچہ جسے اپنی مادری زبان میں ایک چھوٹا سا کتابچہ یاد کرانا بھی دشوار ہوتا ہے وہ بچہ ایک اجنبی زبان کی اتنی ضخیم کتاب کس طرح یاد کر کے فرفر سنا دیتا ہے۔

یہ قرآن کا اعجاز و خاصہ ہی تو ہے۔اسی طرح قرآن پاک کو بار بار پڑھنے میں ہر بار ایک نیا ہی سرور آتا ہے۔ اس کلام پاک کا ایک معجزہ یہ بھی ہے کہ جب تک یہ کلام پاک اس دنیا میں موجود ہے اس وقت تک قیامت نہیں آسکتی۔ قیامت تب آئے گی جب اﷲ پاک قرآن پاک، قرآن پاک پڑھنے والے اور پڑھانے والوں کو اس دنیا سے اٹھالے گا۔

حضرت عمر ؓ فرماتے ہیں کہ حضور اکرم ﷺ نے فرمایا اﷲ تعالیٰ اس کتاب (قرآن مجید) کی وجہ سے کتنے ہی لوگوں کو بلند مرتبہ کرتا ہے اور کتنے ہی لوگوں کو پست اور ذلیل کرتا ہے۔

قرآن پاک جہاں رشد و ہدایت کا سرچشمہ ہے وہاں قرآن پاک رسول اکرم ﷺ کا ایک دائمی معجزہ بھی ہے۔ اور اس سلسلہ میں اﷲ پاک نے نزول قرآن کے ساتھ ہی سورۃ البقرہ کی آیت نمبر 23 میں چیلنج کر دیا ہے، ترجمہ ''پھر تم بنا لاؤ ایک محدود ٹکڑا جو اس کا ہم پلہ ہو اور بلا لاؤ اپنے حمایتوں کو جو خدا سے الگ (تجویز کر) رکھے ہیں، اگر تم سچے ہو۔''

قرآن حکیم کی مکمل پیروی کی جائے تو کوئی دجل و فریب و طاغوت امت مسلمہ کو مغلوب نہیں کر سکتا۔ جب تک مسلمانوں نے قرآن و سنت سے اپنا رشتہ استوار رکھا اس وقت تک وہ پوری دنیا پر حکم رانی کرتے رہے۔ لیکن جب مسلمان نے صرف دولت دنیا ہی کو اپنی زندگی کا محور بنالیا، تب سے آج تک مسلمان مسلسل مغلوب ہوتے جا رہے ہیں۔ قرآن پوری دنیا کے لیے مکمل ضابطہ حیات ہے اور قیامت تک آنے والی انسانیت کے لیے ہدایت کا سرچشمہ ہے۔ یہ حقیقت ہے کہ قرآن عظیم الشان کے ساتھ حضور ﷺ کی سیرت اور سنت جب تک نہ ہوگی اس پر عمل نہیں ہوگا۔

قرآن حکیم کا گہرائی اور دل چسپی سے مطالعہ کیا جائے تو یہ ایک ایسی عالم گیر کتاب ہے، جس میں تمام شعبہ ہائے زندگی کی راہ نمائی کے لیے وسیع موضوعات، مسائل اور ان کا حل موجود ہیں۔ اﷲ تعالیٰ نے قرآن مجید کو ایک مکمل ضابطۂ حیات کے طور پر نازل کیا ہے۔

اس میں انسانی زندگی کے حقائق، حق و باطل، حلال و حرام، جزا و سزا، ثواب و عذاب، اخلاقی تعلیمات، انسان کی انفرادی اور اجتماعی زندگی کے مسائل اور ان کا حل، معاشرتی حقوق و فرایض، معاشی و اقتصادی امور کے بارے میں تمام ضروری احکامات غرض یہ کہ ہر طرح کی راہ نمائی ملتی ہے۔ قرآن مجید ایک معجزہ ہے اور فصاحت و بلاغت میں اس کا کوئی ثانی نہیں اور نہ ہی کبھی ہو سکتا ہے۔ قرآن مجید نہ صرف مسلمانوں کے لیے بل کہ غیر مسلموں کو بھی راہ نمائی مہیا کرتا ہے۔ بہت سے غیر مسلم جو قرآن پر تحقیق کرنے نکلے اور پھر اس کو سمجھ کر اﷲ کی وحدانیت اور نبی کریم ﷺ کی رسالت پر ایمان لے آئے۔ قرآن مجید ہی وہ الہامی کتاب ہے جس میں ہمارے تمام سوالات کے جوابات اور دینی و دنیاوی مسائل اور مشکلات کا حل موجود ہے۔

رمضان المبارک میں قرآن حکیم نازل ہوا تھا، اس ماہ مبارک میں ہمیں بہترین موقع میسر ہوگا کہ ہم قرآن مجید کی تلاوت کریں، قرآن مجید کا ترجمہ پڑھیں، اس پر غور و فکر کریں اور اس کے احکامات پر عمل پیرا ہوجائیں۔

دعا ہے کہ اﷲ تبارک و تعالیٰ کی ذات مبارکہ حضور پُرنور ﷺ کے صدقے ہمیں قرآن حکیم کو پڑھنے، سمجھنے اور اس پر مکمل عمل کرنے کی توفیق عطا فرمائے اور ہمارا خاتمہ بالخیر فرمائے۔ آمین