سلمان خان سے ناراضگی فلم سلطان میں ارجیت سنگھ کی جگہ راحت فتح گانا گائیں گے

سلمان خان نے فلم سلطان کیلئے ارجیت سنگھ کی آواز میں گایا ہوا گانا فلم سے نکلوا دیا۔۔ فوٹو:فائل

---

بالی ووڈ دبنگ سلمان خان کی نئے آنے والی فلم سلطان میں گلوکار ارجیت سنگھ کی بجائے پاکستانی نامور گلوکار راحت فتح علی خان گانا گائیں گے۔

بالی ووڈ میں دبنگ سلمان خان ایسے اداکارمانے جاتے ہیں جن سے ناراض ہونا سب ہی کو مہنگا پڑجاتا ہے جیسا کہ گلوکار ارجیت سنگھ کے ساتھ ہوا جنہوں نے ایک محفل میں دبنگ خان کے بارے میں کچھ کہا جس پر وہ ناراض ہوگئے اور سلمان خان ہیں کہ اب مان ہی نہیں رہے اور اپنی ناراضگی برقرار رکھتے ہوئے اب انہوں نے فلم میں ایک گانے کے لیے ارجیت سنگھ کی جگہ پاکستانی گلوکار راحت فتح علی کی مدد مانگ لی ہے۔

بھارتی میڈیا رپورٹس کے مطابق بالی ووڈ اداکار سلمان خان نے گلوکار ارجیت سنگھ سے ناراضگی کے باعث اپنی نئی آنے والی فلم "سلطان" میں ان کی آواز میں گایا جانے والا گانا "جگ گھومیو" نکلوا دیا ہے جب کہ اب اس گانے کے لیے فلم کی پوری ٹیم کی جانب سے فیصلہ کیا گیا ہے کہ وہ مایہ نازپاکستانی گلوکارراحت فتح علی خان کی مدد لیں گے جہاں فلم بنانے والوں کا یہ ماننا ہے کہ راحت فتح علی خان اپنی درد بھری آواز سے اس گانے کے ساتھ خوب انصاف کریں گے۔

واضح رہے کہ فلم سلطان کا "جگ گھومیو" گانا سلمان خان کا بھی پسندیدہ گانا ہے جوایک ایسے شخص کے حوالے سے ہے جو پوری دنیا میں گھومتا ہے لیکن اسے آپ میں گم ہوکرہی سکون ملتا ہے۔