گھٹنے کی آواز سن کر جوڑوں کی کیفیت بتانے والا نظام تیار

گھٹنے پر چھوٹے مائیک لگا کر ان کی آواز ریکارڈ کی جاتی ہے اور ان کا تجزیہ کرکے ہڈیوں کی کیفیت کا جائزہ لیا جاتا ہے۔

ویب ڈیسک June 01, 2016

گھٹنے پر چھوٹے مائیک لگا کر ان کی آواز ریکارڈ کی جاتی ہے اور ان کا تجزیہ کرکے ہڈیوں کی کیفیت کا جائزہ لیا جاتا ہے۔ فوٹو؛ فائل

ہمارے گھٹنے سے آنے والی آوازیں بھی ہمیں اس کی خرابی سے آگاہ کرسکتی ہیں اور اب ماہرین نے ایک نظام بنایا ہے جو اس کی آوازوں کو نوٹ کرکے گھٹنے کی صحت کے بارے میں بتاسکتا ہے۔

جارجیا ٹیک کے الیکٹرکل انجینیئرعمر آئنان کا کہنا ہے ہمارے گھٹنوں کی آواز میں اہم معلومات چھپی ہوتی ہیں اسے سن کر ہم گھٹنے اور جوڑوں کی کیفیت کا اندازہ لگاسکتے ہیں اور اسے مریضوں کی بحالی میں استعمال کیا جاسکتا ہے۔ انہوں نے ڈیفینس ایڈوانسڈ ریسرچ پروجیکٹ ایجنسی ( ڈارپا) کے مالی تعاون سے ایسے چھوٹے اور نفیس مائیکروفون تیار کیے ہیں جو ٹانگوں کی حرکت سے گھٹنوں میں ہونے والی معمولی آوازوں کو بھی نوٹ کرسکتے ہیں، یہ آواز گھٹنوں کی حرکت اور کرکری ہڈی (کارٹیلج) کی رگڑ سے پیدا ہوتی ہے۔

عمر آئنان نے باریک مائیکروفون اور سینسر کو ایک ٹیپ پر لگایا اور اسے کھلاڑیوں کو پہنایا جس سے معلوم ہوا کہ اگر ہڈیوں سے غیرہموار اور بے ترتیب انداز میں متواتر آوازیں آتی رہیں تو وہ ظاہر کرتی ہیں کہ ہڈی میں کوئی سنجیدہ مسئلہ پیدا ہوچکا ہے اور اس کا علاج کیا جانا ضروری ہے۔ اس نظام کو مریضوں کے گھٹنے کے آپریشن کے بعد ان کی بحالی کا جائزہ لینے کے لیے استعمال کیا جاسکتا ہے اور اس کے بہت سے فوائد حاصل ہوں گے۔