پنجاب میں سورج آگ برسانے لگا لاہور میں گرمی کے باعث سڑکوں کا تارکول پگھلنے لگا

ملک کے بیشتر حصے میں سورج آگ برسا رہا ہے تاہم لاہور سمیت پنجاب کے بیشتر حصے میں غیر متوقع گرمی کے لوگوں کو گھروں میں محصور کردیا ہے۔

ملک بھر میں گرمی کی شدت تاحال برقرار ہے اور بیشتر علاقوں میں گرمی کی شدت میں کم ہونے کا نام نہیں لے رہی ، سورج کی تپش اور لوڈ شیڈنگ نے عوام کو مزید پریشان کررکھا ہے۔ سندھ اور پنجاب میں کئی علاقے آج صبح سے ہی گرمی کی شدید لپیٹ میں ہیں اور محکمہ موسمیات کے مطابق اب تک سب سے ذیادہ درجہ حرارت سکھرمیں ریکارڈ کیا گیا جہاں پارہ 47 ڈگری سینٹی گریڈ تک پہنچ چکا ہے۔

دیگر شہروں میں لاہور، حیدرآباد، موہنجودڑو، بہاولنگر، نورپورتھل اور اوکاڑہ میں 46 ڈگری سینٹی گریڈ ریکارڈ کیا گیا ہے۔ بھکر، منڈی بہاؤالدین، ٹوبہ ٹیک سنگھ، جہلم ، قصور ،جیکب آباد ،ساہیوال ،شہید بے نظیر آباد ،رحیم یار خان میں درجہ حرارت 45 ڈگری سینٹی گریڈ ہے ۔ فیصل آباد، منگلا، خان پور، جھنگ ،کوٹ ادو اور بہاولپورمیں درجہ حرارت44 ڈگری سینٹی گریڈ ریکارڈ کیا گیا، محکمہ موسمیات کے مطابق سیالکوٹ ، ڈیرہ غازی خان ، گوجرانوالہ اور ملتان میں درجہ حرارت 43 ڈگری سینٹی گریڈ ہے۔


راولپنڈی،پشاور،گجرات اور لیہ میں 42 جبکہ تربت میں درجہ حرارت 40 ڈگری سینٹی گریڈ ریکارڈ کیا گیا ہے۔ کراچی اورسیدوشریف میں 38 ، مظفراباد 36 جبکہ کوئٹہ اور گوادر میں اب تک کا درجہ حرارت 35 ڈگری سینٹی گریڈ ہے۔

محکمہ موسمیات کے مطابق آئندہ 24 گھنٹوں میں ملک کے بیشتر حصوں میں موسم گرم اور خشک رہے گا جبکہ مالاکنڈ ، کوہاٹ ، اسلام آباد سمیت بالائی علاقوں میں بارش کا امکان ہے۔

دوسری جانب کمشنر کراچی آصف حیدر شاہ کےتبادلے کے بعد شہر میں عوام کو ہیٹ اسٹروک سے بچانے کے لئے لگائے گئے ریلیف کیمپس ہٹا دیئے گئے ہیں، ان ہیٹ اسٹروک کیمپس میں ٹھنڈے پانی ، سایہ اور برف کے سہولیات فراہم کی گئیں تھیں ۔