سٹی ٹریفک پولیس نے رمضان المبارک میں شہریوں کی سہولت کے لیے ٹریفک پلان جاری کردیا ہے۔
قائم مقام چیف ٹریفک آفیسر راولپنڈی افتخارالحق کے مطابق خریداری کے خواہش مند حضرات کے رش کو مدنظر رکھتے ہوئے مارکیٹوں میں پارکنگ اور ٹریفک کو رواں دواں رکھنے کے لیے ٹریفک کے خصوصی انتظامات کیے گئے ہیں۔ غلط پارکنگ کے خلاف ایکشن لینے کے لیے مصروف مقامات پر لفٹرز موجود رہیں گے جو غلط پارک کی گئی گاڑی کو فوری طور پر لفٹ کرلیں گے تاکہ غلط پارکنگ کی وجہ سے ٹریفک بلاک نہ ہو۔
افتخارالحق کا کہنا تھا کہ مارکیٹوں میں مقررہ جگہوں پر ہی پارکنگ کرائی جائے گی کسی بھی جگہ پر ڈبل پارکنگ کی اجازت نہیں ہوگی، مشکوک ، کالے شیشے اور بغیر نمبر پلیٹ گاڑیوں اور موٹر سائیکلوں کے خلاف قانونی کاروائی عمل میں لائی جائے گی، اس کے علاوہ اس ماہ مبارک میں آنے والے خصوصی ایام کے موقع پر خصوصی انتظامات کے ساتھ ساتھ وارڈنز کی خصوصی ڈیوٹیاں بھی لگائی جائیں گی۔