حصص مارکیٹ میں نیا ریکارڈ بننے کے باوجود سرمایہ کاروں کو 22 ارب کا نقصان

کاروباری حجم گزشتہ جمعہ کی نسبت 10.29کم رہا اور مجموعی طور پر22 کروڑ75 لاکھ 15 ہزار930 حصص کے سودے ہوئے فوٹو : فائل

---

پاکستان اسٹاک ایکس چینج میں پیر کوحصص کی تجارتی سرگرمیاں بجٹری اقدامات کے زیراثر رہیں، کاروباری حجم اور مارکیٹ کیپٹلائزیشن اگرچہ کم رہا لیکن فرٹیلائزر اور ٹیکسٹائل سیکٹر میں بڑھتی ہوئی خریداری سرگرمیوں کے باعث 100 انڈیکس ملکی تاریخ میں پہلی بار37352 پوائنٹس کی نئی حد رقم کرگیا، محدود تیزی کے سبب 42.58 فیصد حصص کی قیمتیں بڑھ گئیں لیکن آل شیئرانڈیکس میں7.46 پوائنٹس کی کمی کے سبب سرمایہ کاروں کے2 ارب23 کروڑ60 لاکھ28 ہزار735 روپے ڈوب گئے۔

ماہرین اسٹاک کا کہنا تھا کہ بعض بجٹری اقدامات اور آئندہ ہفتے مقامی کمپنیوں کی ایم ایس سی آئی میں شمولیت کے امکانات کے پیش نظر مخصوص شعبوں میں سرمایہ کاری رحجان غالب رہا جس سے مارکیٹ کا مورال بلندی کی جانب گامزن ہوا تاہم اس دوران تیل و گیس، بینکنگ اور سیمنٹ سیکٹر میں فروخت کے دباؤکی وجہ سے ایک موقع پر23 پوائنٹس کی مندی بھی رونما ہوئی لیکن ٹیکسٹائل اورفرٹیلائزرکمپنیوں میں سرمایہ کاری برقرار رہنے سے مندی کے اثرات زائل ہوگئے، کاروبار کے اختتام پر کے ایس ای100 انڈیکس 129.27 پوائنٹس کے اضافے سے پہلی بار 37352.27 ہوگیا جبکہ کے ایس ای30 انڈیکس 61.26 پوائنٹس کے اضافے سے 21429.24 ، کے ایم آئی30 انڈیکس563.91 پوائنٹس کے اضافے سے 66047.71 اور کے ایم آئی آل شیئر انڈیکس 97.96 پوائنٹس کے اضافے سے 17702.10 ہوگیا۔

کاروباری حجم گزشتہ جمعہ کی نسبت 10.29کم رہا اور مجموعی طور پر22 کروڑ75 لاکھ 15 ہزار930 حصص کے سودے ہوئے جبکہ کاروباری سرگرمیوں کا دائرہ کار371 کمپنیوں کے حصص تک محدود رہا جن میں158 کے بھاؤ میں اضافہ، 198 کے داموں میں کمی اور15 کی قیمتوں میں استحکام رہا، جن کمپنیوں کے حصص کی قیمتوں میں نمایاں اضافہ ہوا ان میں سفائرٹیکسٹائل کے بھاؤ33.75 روپے بڑھ کر 708.75 روپے اور فروز سنز لیب کے بھاؤ 33.68 روپے بڑھ کر1028.30 روپے ہوگئے جبکہ رفحان میظ کے بھاؤ 430 روپے کم ہوکر8270 روپے اور نیسلے پاکستان کے بھاؤ 67.79 روپے کم ہوکر 7445.77 روپے ہوگئے۔