مقبوضہ کشمیر میں ایک بار پھر پاکستانی پرچم لہرا دیا گیا

بھارتی فوج نے مظاہرین پر لاٹھی چارج اور آنسو گیس شیل بھی فائر کئے۔

ویب ڈیسک July 01, 2016

مقبوضہ کشمیر کے دیگر شہروں میں بھی بھارتی اور اسرائیلی جارحیت کے خلاف ریلیاں نکالی گئیں۔ فوٹو: فائل

مقبوضہ کشمیر میں ایک بار پھر پاکستانی پرچم لہرا دیا گیا ہے جب کہ بھارتی فوج نے روایتی ہٹ دھرمی کا مظاہرہ کرتے ہوئے مظاہرین پر لاٹھی چارج کیا۔

کشمیر میڈیا سروس کے مطابق حریت رہنماؤں کی اپیل پر جمعتہ الوداع کے بعد کشمیری عوام کی جانب سے بھارتی جارحیت کے خلاف یوم سیاہ اور اپنے فلسطینی بھائیوں سے اظہار یکجہتی کے لئے یوم القدس کے حوالے سے سری نگر میں نکالی جانے والی ریلی میں ایک بار پھر پاکستانی پرچم لہرا دیا گیا جب کہ بھارتی فوج کی جانب سے مظاہرین پر لاٹھی چارج اور آنسو گیس شیل فائر کئے گئے، مظاہرین کی جانب سے بھارت کے خلاف شدید نعرے بازی بھی کی گئی جب کہ مقبوضہ کشمیر کے دیگر شہروں میں بھی بھارتی اور اسرائیلی جارحیت کے خلاف ریلیاں نکالی گئیں۔

واضح رہے کہ اس سے قبل بھی مقبوضہ کشمیر کی عوام متعدد مواقع پر پاکستان سے اپنی والہانہ محبت کا اظہار کرتے ہوئے سبز ہلالی پرچم ہوا میں لہرا چکی ہے۔