دہشت گردی کے خلاف جنگ میں پاکستان کا کردارانتہائی اہم ہے امریکی سینیٹرجان مک کین

امریکی سینیٹر جان مک کین نے اپنے دورہ پاکستان کے دوران سیاسی و عسکری قیادت سے ملاقاتیں کیں جن کا کہنا تھا کہ دہشت گردی کے خلاف جنگ میں پاکستان کا کردار اہم ہے۔

سماجی رابطے کی ویب سائٹ ٹوئٹر پر اپنے دورہ پاکستان کی تفصیلات سے آگاہ کرتے ہوئے سینیٹر جان مک کین نے وزیراعظم کے مشیر برائے امور خارجہ سرتاج عزیز، آرمی چیف جنرل راحیل شریف اور دیگر اہم شخصیات سے ملاقاتوں کی تصاویر ٹوئٹ کیں۔ جس میں ان کا کہنا تھا کہ پاکستانی آرمی چیف کے ساتھ ملاقات بہت اچھی رہی جس میں علاقائی سلامتی کے امور پر تبادلہ خیال کیا گیا جب کہ وزبراعظم نواز شریف کے مشیر برائے امور خارجہ سرتاج عزیز سے بھی وفود کی سطح پر ہونے والی ملاقات مفید رہی۔

سینیٹر جان مک کین کا کہنا تھا کہ امریکی وفد کو جنوبی وزیرستان اور میران شاہ میں جاری آپریشن ضرب سے متعلق بریفنگ دی گئی جب کہ امریکی وفد نے آپریشن ضرب عضب کے شہدا کی یادگار کا دورہ بھی کیا۔