امید ہے امجد صابری کے قاتلوں کو گرفتار کیا جائے گا فاروق ستار

لوگ اپنی ذمہ داریاں پوری کرلیں تو عوام کی زندگی کو بہتر بنایا جاسکتا ہے، فاروق ستار فوٹو: فائل

---

ایم کیو ایم کے رہنما ڈاکٹر فاروق ستار کا کہنا ہے کہ امجد صابری کی ٹارگٹ کلنگ ایک لمحہ فکریہ ہے اس لئے امید ہے کہ ان کے قاتلوں کو گرفتار کیا جائے گا۔

کراچی میں امجد فرید صابری کے گھر پر تعزیت کے بعد فاروق ستار نے میڈیا سے کہا کہ لوگ بہت دکھی ہیں اور ان کے دکھوں کا مداوا ہونا چاہیئے، اگر سب لوگ اپنی اپنی ذمہ داریاں پوری کرلیں تو لوگوں کی زندگی کو بہتر بنایا جاسکتا ہے، امجد فرید صابری کا بھی یہی مشن تھا، وہ اپنی زندگی میں کئی خاندانوں کی کفالت کرتے تھے، امجد صابری سے رمضان کی رونق تھی، ان کی ٹارگٹ کلنگ ایک لمحہ فکریہ ہے،محبت اور امن کا پیغام دینے والوں کو لوگوں سے چھین لینا کسی طور بھی درست نہیں، امید ہے کہ امجد فرید صابری کے قاتلوں کو گرفتار کیا جائے گا اور ان قاتلوں کے پیچھے کارفرما لوگوں کو بھی بے نقاب کیا جائے گا۔

فاروق ستار نے کہا کہ آفتاب احمد ان کے کوآرڈینیٹر اور ایم کیو ایم کے سینئیر کارکن تھے، ان کا بھی قتل ہوا۔ آرمی چیف نے خود کہا تھا کہ انصاف کے تقاضے پورے ہوں گے لیکن 2 ماہ بعد بھی اس کی کوئی رپورٹ سامنے نہیں آئی، انہیں امید ہے کہ آفتاب احمد کے قاتلوں کو گرفتار کیا جائے گا اور اگر ان کے قاتلوں کے پیچھے کوئی ہے تو وہ بھی سامنے لایا جائے گا۔