لاہور سمیت پنجاب کے مختلف شہروں میں بارش

پنجاب کے مختلف شہروں میں بارش سے موسم خوشگوار ہوگیا جب کہ لاہور میں عید کے دوسرے روز بھی بادل جم کر برسے۔

ایکسپریس نیوز کےمطابق پنجاب کے مختلف شہروں میں بارش سے موسم خوشگوار اور ہر طرف جھل تھل ہوگیا جب کہ بارش سے شہریوں کے چہرے بھی خوشی سے کھل اٹھے۔ پنجاب میں قصور، شیخوپورہ، فیصل آباد، گوجرانوالہ سمیت دیگر شہروں میں بارش کا سلسلہ صبح سے ہی شروع ہوگیا جس سے موسم خوشگوار ہوگیا اور ٹھنڈی ہوائیں چلنے لگیں۔


لاہور میں بھی عید کے دوسرے روز بادل ایک بار پھر جم کر برسے اور شہر میں باران رحمت سے موسم خوشگوار ہوگیا اور ٹھنڈی ہوائیں چلنے لگیں۔ شہر میں گزشتہ روز سے وقفے وقفے سے بارش کا سلسلہ جاری ہے اور عید کے دوسرے روز صبح کے اوقات میں موسلا دھار بارش ہوئی جس سے لاہوریوں کی عید کا مزہ دوبالا ہوگیا اور شہریوں نے ناشتے کے لیے ہوٹلوں کا رخ کرلیا، شہری اپنے اہل خانہ کے ساتھ ہوٹلوں پر پہنچ گئے اور موسم کا بھرپور لطف اٹھایا۔

دوسری جانب لاہور میں بارش سے لیسکو کی کارکردگی کا پول بھی کھل گیا اورایک بار پھر شہر کے متعدد علاقے بجلی سے محروم ہوگئے جس سے شہریوں کو شدید مشکلات کا سامنا ہے۔ اس کے علاوہ شہر میں بارش سے نشیبی علاقے بھی زیر آب آگئے۔