خیبر پختونخوا حکومت کا ایدھی فاؤنڈیشن کو مفت اراضی فراہم کرنے کا اعلان

عبدالستار ایدھی جیسا انسان دنیا میں کبھی پیدا نہیں ہو سکتا، وزیراعلیٰ خیبر پختونخوا

ویب ڈیسک July 10, 2016

عبدالستار ایدھی جیسا انسان دنیا میں کبھی پیدا نہیں ہو سکتا، وزیراعلیٰ خیبر پختونخوا. فوٹو: آن لائن

وزیراعلیٰ خیبر پختونخوا پرویز خٹک نے عبدالستار ایدھی کو خراج عقیدت پیش کرتے ہوئے ایدھی فاؤنڈیشن کے لئے مفت زمین فراہم کرنے کا اعلان کیا ہے۔

وزیراعلیٰ خیبر پختونخوا پرویز خٹک، اسپیکر اسد قیصر اور صوبائی کابینہ کے اراکین کے ہمراہ ایدھی ولیج کراچی پہنچے اورعبدالستار ایدھی کی قبر پر فاتحہ خوانی کی اور پھولوں کی چادر چڑھائی۔ اس موقع پر میڈیا سے بات کرتے ہوئے پرویز خٹک کا کہنا تھا کہ عبدالستار ایدھی ہمارے ملک کے بہت بڑے ہیرو تھے، انھوں نے جن مشکل حالات میں زندگی گزاری اس پر پوری قوم انھیں خراج تحسین پیش کرتی ہے، ان جیسا انسان دنیا میں کبھی پیدا نہیں ہوسکتا۔

وزیراعلی خیبرپختونخوا کا کہنا تھا کہ عبدالستار ایدھی خدائی خدمت گار تھے اور ہم بھی ان کے اس مشن میں اپنا حصہ ملانا چاہتے ہیں، مرحوم کے لئے جو ہو سکا وہ کریں گے، ایدھی فاؤنڈیشن کو اپنے مراکز کھولنے کے لئے صوبے میں جہاں بھی جگہ چاہیئے ہوگی انہیں مفت اراضی فراہم کی جائے گی۔