کراچی آپریشن سے شہر میں 80 فیصد دہشتگردی کم ہوئی رینجرز کی سپریم کورٹ کو رپورٹ

ٹارگٹ كلنگ 75 اور اغوا برائے تاوان میں 70 جب کہ بھتہ خوری كی واداتوں میں 60 سے 70 فیصد كمی آئی، رپورٹ، فوٹو؛ فائل

---

سندھ رینجرز نے سپریم کورٹ کے سامنے اپنی کارکردگی کی رپورٹ پیش کردی جس کے مطابق کراچی آپریشن کے باعث شہر میں دہشت گردی کے واقعات میں 80 فیصد کمی آئی ہے۔

سپریم كورٹ میں كراچی بد امنی كیس كے دوران پیش كی جانے والی رینجرز کی کارکردگی رپورٹ كے مطابق كراچی میں جاری ٹارگیٹڈ آپریشن 5 ستمبر 2013 كوشروع كیا گیا اور اس آپریشن كے دوران اب تك 7 ہزار 870 چھاپے مارے گئے جن میں 6 ہزار 589 ملزمان كو گرفتار كركے ان كے خلاف قانونی كارروائی كی گئی اور پولیس كے حوالے كر دیا گیا۔

اس خبر کو بھی پڑھیں: کراچی بدامنی کیس کی سماعت کے دوران اویس شاہ اغوا سے متعلق رپورٹ پیش

رپورٹ کے مطابق گرفتار ملزمان كے خلاف 4 ہزار 737 کیسز زیر سماعت ہیں جب كہ اب تك 183 ملزمان كو سزائیں ہوئیں اور 83 بری ہوئے، ان ملزمان میں سے ایك ہزار 308 كی ضمانتیں بھی منظور ہو چكی ہیں۔ سندھ رینجرز كا كہنا ہے كہ چھاپوں كے دوران ملزمان كے قبضے سے 9 ہزار507 ہتھیار جب كہ 5 لاكھ 3 ہزار 277 راونڈز برآمد كیے گئے۔

رینجرز رپورٹ میں بتایا گیا ہےکہ كراچی میں ٹارگیٹڈ آپریشن كے باعث شہر میں دہشت گردی كی 80، ٹارگٹ كلنگ 75، اغوا برائے تاوان كی 70 اور بھتہ خوری كی واداتوں میں 60 سے 70 فیصد كمی آئی ہے جب کہ شہر میں مجموعی طور پر امن وامان كی صورتحال پیدا ہو گئی ہے۔