اِسلام کی عالم گیر دعوت

اِنسان کو اَپنے رَب اور خالق کی عبادت کرنے اور اس کے اَحکامات کے مطابق اَپنی زِندگی گزارے کیلئے پیدا کیا گیا۔

مولانا ڈاکٹر عبدالرزّاق اسکندر July 22, 2016

اِنسان کو اَپنے رَب اور خالق کی عبادت کرنے اور اس کے اَحکامات کے مطابق اَپنی زِندگی گزارے کیلئے پیدا کیا گیا۔ فوٹو: فائل

PESHAWAR: یہ دُنیا دارُ العمل ہے۔ اِس میں اِنسان کو اِسی لیے پیدا کیا گیا ہے کہ وہ اَپنے رَب اور خالق کی عبادت کرے اور اس کی مرضی اور اَحکامات کے مطابق اَپنی زِندگی گزارے۔

چناں چہ اﷲ تعالیٰ نے بندوں کو عبادات کا طریقہ سکھانے اور اُن کو فلاح و بہبود کا رَاستہ بتانے کے لیے اَنبیائے کرام علیہم السلام کا سلسلہ جارِی فرمایا اور اُن پر کتابیں اور صحیفے نازِل فرمائے اور اُن کو حکم دِیا کہ وہ اﷲ کے بندوں کو اس کی ہدایت کی طرف دعوت دیں۔ اَنبیائے کرام علیہم السلام نے اَپنے زمانوں میں اَپنی اُمّت کو دعوت دِی اور اَپنے قول و عمل سے اُن کو اَپنے رَب کی عبادت کرنے کا طریقہ سکھایا، اُنہیں کام یابی کے اُصول بتائے، خود بندوں کے ایک دُوسرے پر جو حقوق ہیں اُن کی تعلیم دِی اور اُن کے ذریعے اُن کے آپس کے جھگڑوں میں فیصلہ فرمایا۔

اِرشادِ بارِی تعالی ہے ''سب لوگ اِبتدا میں ایک ہی دِین پر تھے (پھر اُن میں باہم اِختلاف پیدا ہوا) تو اﷲ تعالیٰ نے نبیوں کو بھیجا، خوش خبری سنانے والے اور ڈرانے والے اور ان کے ساتھ سچی کتاب بھی نازل فرمائی تاکہ لوگوں کے مابین ان باتوں میں فیصلہ کریں جن میں وہ اختلاف کریں۔'' (البقرۃ: 213)

اور چوں کہ ہر پیغمبر کی بعثت کا مقصد یہی ہوتا ہے کہ اﷲ کے حکم سے اس کی اِطاعت کی جائے، اس لیے ہر پیغمبر نے اپنی دعوت میں اپنی اُمّت کو یہ جملہ فرمایا ''پس تم اﷲ سے ڈرتے رہو اور میری اِطاعت اختیار کرو۔'' (الشعراء:163)

ہر پیغمبر نے اپنی اُمت کو توحید کی دعوت دی اور ان کا تعلق خالق حقیقی سے جوڑا، انہیں نیک اعمال اور نیک اخلاق کی تعلیم دی اور معاشرے کی اِصلاح کی طرف پوری توجہ دی، ان میں نیکیوں کو پھیلایا اور ان کے اچھے نتائج کی خوش خبری دی اور انہیں برے اعمال سے روکا اور ان کے برے نتائج سے آگاہ کیا۔

قرآنِ کریم اور احادیث نبویؐ سے یہ بات بھی ثابت ہے کہ سابقہ انبیائے کرام علیہم السلام کی دعوت اپنی اپنی قوم، قبیلے اور شہر تک محدود تھی، چناں حضرت ہود علیہ السلام کے بارے میں فرمایا '' اور ہم نے قومِ عاد کی طرف ان کے بھائی ہود کو بھیجا۔'' (الاعراف:65)

حضرت صالح علیہ السلام کے بارے میں فرمایا ''اور ہم نے قومِ ثمود کی طرف ان کے بھائی صالح کو بھیجا۔'' (الاعراف:72)

حضرت شعیب علیہ السلام کے بارے میں فرمایا '' اور ہم نے اہل مدین کی طرف ان کے بھائی شعیب کو بھیجا۔'' (الاعراف:85)

اسی طرح حضرت موسیٰ اور حضرت عیسیٰ علیہم السلام کو بنی اسرائیل کی طرف مبعوث کیا گیا اور انہوں نے اپنی قوم کو آسمانی ہدایت کی طرف دعوت دی۔

ان تمام انبیائے کرام علیہم السلام کے آخر میں اﷲ تعالیٰ نے حضرت محمد صلی اﷲ علیہ وَسلم کو ایک عالم گیر دعوت دے کر بھیجا۔ جو کسی خاص قوم یا ملک کے لیے نہ تھی، بل کہ اَقوامِ عالم اور قیامت تک آنے والے انسانوں کے لیے تھی۔ اس عالم گیر دعوت کو قرآنِ کریم نے مختلف انداز میں پیش فرمایا۔ نبی کریم صلی اﷲ علیہ وَسلم کی رسالت کی عمومیت کو اس طرح بیان فرمایا ''آپ کہہ دیجیے اے لوگو! میں رسول ہوں اﷲ کا تم سب کی طرف، جس کی حکومت ہے آسمانوں اور زمین میں، کوئی بھی عبادت کے لائق نہیں اس کے سوا، وہی زندہ کرتا ہے وہی مارتا ہے، سو ایمان لاؤ اﷲ پر اور اس کے بھیجے ہوئے نبی اُمی پر جو کہ یقین رکھتا ہے اﷲ پر اور اس کے سب کلاموں پر اور اس کی پیروی کرو تاکہ تم راہ پاؤ۔'' (الاعراف:158)

سورۃ بقرۃ میں تمام اِنسانوں کو خطاب کرتے ہوئے فرمایا ''اے لوگو! بندگی کرو اپنے رب کی جس نے تم کو پیدا کیا اور ان کو جو تم سے پہلے تھے تاکہ تم پرہیزگار بن جاؤ۔'' (البقرۃ:21)

اسی طرح قرآنِ کریم نے اہل کتاب (یہود و نصاریٰ) کو اس عالم گیر دعوت کی طرف بلاتے ہوئے فرمایا ''اے اہل کتاب! اِیمان لاؤ اُس کتاب پر جو ہم نے نازِل کی (یعنی قرآنِ کریم) تصدیق کرتی ہے اس کتاب کی جو تمہارے پاس ہے۔'' (النساء)

اسی طرح قرآنِ کریم میں بیسیوں آیات ایسی ہیں جن میں اسلام کی عالم گیر دعوت کو بیان کیا گیا ہے اور یہ بھی اعلان کیا گیا ہے کہ اب قیامت تک تمام انسانوں کے لیے یہی راہِ نجات ہے۔

ارشادِ باری تعالیٰ ہے '' اور جو کوئی اسلام کے سوا کسی اور دین کو چاہے گا سو وہ اس سے ہرگز قبول نہ ہوگا اور وہ آخرت میں خسارہ پانے والوں میں سے ہوگا۔''

(آلِ عمران:85)

چوں کہ اسلام ایک عالم گیر دعوت ہے اس لیے نبی کریم صلی اﷲ علیہ وَسلم نے اسے عربوں تک محدود نہیں رکھا بل کہ اپنے زمانے کے ملوکِ عالم کو اس کی دعوت دی اور فارس، روم، مصر وغیرہ کے بادشاہوں کے پاس اپنے نمائندے بھیجے اور ان کو اسلام کی طرف دعوت دی۔

چوں کہ خاتم الانبیاء صلی اﷲ علیہ وَسلم کے بعد کوئی نبی آنے وَالا نہ تھا، اس لیے اس عالم گیر دعوت کا فریضہ آپ صلی اﷲ علیہ وَسلم کی اُمّت پر ڈالا گیا۔

ارشادِ باری تعالیٰ ہے '' تم سب اُمّتوں سے بہتر ہو جو بھیجی گئی عالم میں، حکم کرتے ہو اَچھے کاموں کا اور منع کرتے ہو برے کاموں سے اور اِیمان لاتے ہو اﷲ پر۔'' (آلِ عمران:110)

لہٰذا یہ اُمّت کسی خاص قوم و نسب یا مخصوص ملک و اقلیم میں محصور نہیں بل کہ اس کا دائرۂ عمل سارے عالم کے لیے اور انسانی زندگی کے تمام شعبوں پر محیط ہے گویا اس کا وجود ہی اس لیے ہے کہ دوسروں کی خیر خواہی کرے اور جہاں تک ممکن ہو انہیں جنت کے دروازوں پر لاکھڑا کرے۔

آج قرآنِ کریم کی یہ آیات اُمّت محمدی ﷺ سے مطالبہ کر رہی ہیں کہ وہ اپنے اس فریضہ کو بجا لائیں اور دین اسلام پر خود عمل کریں اور اس کی دعوت کو اقوامِ عالم تک پہنچائیں اور انہیں کفر و ضلالت کے اندھیروں سے نکال کر اسلام کی روشنی اور اُجالے میں لائیں۔ وگرنہ قیامت کے دن پوری اُمّت کو اس کوتاہی کا جواب دینا ہوگا۔ اﷲ تعالیٰ ہمیں اور پوری اُمّت کو اسلام کی دعوت کے فرض کو بجالانے کی توفیق عطا فرمائیں۔ آمین