پاکستان سے آزاد تجارتی معاہدہ پہلی ترجیح ہے برطانوی ڈپٹی ہائی کمشنر

برطانوی بزنس کمیونٹی پاکستان میں مزید سرمایہ کاری کرنے کی خواہاں ہے،برٹش ڈپٹی ہائی کمشنر بیلنڈا لیوس

نیوز رپورٹر July 24, 2016

پاکستان اور برطانیہ کے برنس سیکٹر میں مزید مستحکم تعلقات کی اشد ضرورت ہے، نائب صدر ایف پی سی سی آئی۔ فوٹو: فائل

باہمی تجارت کے فروغ کے لیے پاکستان کے ساتھ آزادانہ تجارت کے معاہدے پر دستخط کرنا ہماری اولین ترجیح ہے، یورپی یونین سے علیحدگی کے برطانیہ پاکستان تجارتی تعلقات پر کوئی اثرات مرتب نہیں ہوں گے، پاکستانی کاروباری برادری کے لیے ویزا پروسیس انتہائی آسان اورتیز ہے۔

ان خیالات کا اظہار برٹش ڈپٹی ہائی کمشنر بیلنڈا لیوس نے فیڈریشن آف پاکستان چیمبر زآف کامرس اینڈ انڈسٹری (ایف پی سی سی آئی) کے ریجنل آفس کے دورے کے موقع پر دوطرفہ باہمی تجارت کے فروغ کے حوالے سے کاروباری برادری سے گفتگو کے دوران کیا۔ انہوں نے کہاکہ برطانیہ پاکستان سے امپورٹ کرنے والا تیسرا بڑا ملک ہے، برطانوی بزنس کمیونٹی پاکستان میں مزید سرمایہ کاری کرنے کی خواہاں ہے، پاکستان اور برطانیہ کے درمیان بزنس کو مزید بڑھایا جا سکتا ہے۔

اس موقع پر ایف پی سی سی آئی ریجنل چیئرمین میاں رحمن عزیز نے کہاکہ دونوں ممالک کے نجی شعبے میں روابط کو بہتر کرکے پاکستان اور برطانیہ کی تجارت کے باہمی حجم میں مزید اضافہ کیا جا سکتا ہے، دونوں ممالک میں ویزا پروسیس آسان اور سادہ ہونا چاہیے۔ انہوں نے کہا کہ برطانیہ کولڈ اسٹوریج،کول مائننگ، فارماسیوٹیکل، الیکٹریکل اپلائنسز، کمپیوٹر، ٹیلی ویژن، ٹیکسٹائل، گارمنٹس، فرنیچر اور پلاسٹک کے شعبوں میں بہت ترقی کر چکا ہے، ان شعبوں میں اس کا تجربہ پاکستان کے لیے فائدہ مند ثابت ہو سکتا ہے۔

سارک چیمبر کے نائب صدر افتخار علی ملک نے کہاکہ پاکستان برطانیہ کو ٹیکسٹائل، لیدر اور دیگر مصنوعات برآمد کرتا ہے، برطانیہ بھی پاکستان کو ایکسپورٹ کرنے والا بڑا ملک ہے۔ ایف پی سی سی آئی کے نائب صدر سید محمد عاصم نے کہا کہ پاکستان اور برطانیہ کے برنس سیکٹر میں مزید مستحکم تعلقات کی اشد ضرورت ہے۔