سلمیٰ آغا کی بیٹی ساشا پاکستانی فلم میں کام کریں گی

پاکستانی فلم میں جب بھی دکھائی دی تومنفرد انداز شائقین کوملے گا، اداکارہ۔ فوٹو: فائل

---

معروف اداکارہ وگلوکارہ سلمیٰ آغا کی صاحبزادی ساشا آغا کوپاکستانی فلم میں سائن کرنے کے لیے ہدایتکار فاروق مینگل نے رابطے تیز کردیے۔

گزشتہ دنوں دبئی کے مقامی ہوٹل میں ہونے والی ملاقات کے دوران فاروق مینگل نے جہاں ساشا آغااور ان کی والدہ سلمیٰ آغا کو فلم کی کہانی سنائی ، وہیں مرکزی کردارکے حوالے سے بھی تفصیلی بات چیت کی۔ اس سلسلہ میں ذرائع کا کہنا ہے کہ ساشا آغا نے اپنی والدہ سے مشاورت کے بعد فلم میں کام کرنے کا گرین سگنل دیدیا ہے لیکن فلم کی دیگر کاسٹ اورشوٹنگ شیڈول کے حوالے سے تاحال کچھ بھی فائنل نہیں کیا گیا ہے۔ جب اس حوالے سے ساشا آغا سے رابطہ کیا گیا تو انھوں نے '' ایکسپریس '' کوبتایا کہ یہ میری دیرینہ خواہش ہے کہ میں کسی پاکستانی فلم میں اپنی صلاحیتوں کے جوہردکھاؤں۔ میری والدہ نے پاکستانی فلموں میں بہت سے یادگارکردارنبھائے ، جن کولوگ آج بھی یادکرتے ہیں۔

میں بھی ان کے نقش قدم پرچلتے ہوئے ان کی مشاورت کے ساتھ ہی بالی ووڈ اورپاکستان فلم انڈسٹری میں کام کرونگی، جہاں تک بات فاروق مینگل کی فلم میں کام کرنے کی ہے توہم اپنی فیملی سے ملاقات کے لیے دبئی میں موجود ہیں اوراسی دوران ہماری ملاقات فاروق مینگل سے ہوئی ہے۔ انھوں نے مجھے ایک بہترین رول آفرکیا ہے ، مگراس بارے میں فی الحال کچھ بھی نہیں بتا سکوں گی، کیونکہ جب تک ہم اس پروجیکٹ کے حوالے سے باقاعدہ کنٹریکٹ سائن نہیں کرلیتے ، اس وقت تک کچھ بھی کہنا یا بتانا درست نہیں ہے۔

البتہ یہ ضرور کہنا چاہوں گی کہ میں پاکستانی فلم میں جب بھی دکھائی دی ، تومنفرد انداز شائقین کوملے گا جو انھیں خوب انٹرٹین کرے گا۔ انھوں نے کہاکہ اس وقت پاکستان فلم انڈسٹری کا نیادورشروع ہوچکا ہے اوربہت سے نئے فلم میکرز اپنی صلاحیتوں کے بل پربڑی اسکرین پراپنا کام متعارف کروارہے ہیں۔ یہی وہ درست طریقہ ہے جس کے ذریعے بہتری اورترقی کے راستے بنتے دکھائی دیتے ہیں۔