سابق صدر آصف علی زرداری آج اپنی 61ویں سالگرہ منا رہے ہیں

آصف علی زرداری کو یہ اعزاز حاصل ہے کہ وہ واحد پاکستانی صدر ہیں جنہوں نے اپنی آئینی مدت پوری کی۔

ویب ڈیسک July 26, 2016

آصف علی زرداری کو یہ اعزاز حاصل ہے کہ وہ واحد پاکستانی صدر ہیں جنہوں نے اپنی آئینی مدت پوری کی۔ فوٹو: فائل

ISLAMABAD: سابق صدر مملکت اور پیپلزپارٹی کے شریک چیئرمین آصف علی زرداری آج اپنی 61ویں سالگرہ منا رہے ہیں۔

26 جولائی 1955 کو آصف علی زرداری نے قبائلی رہنما اور نامور زمیندار حاکم علی زرداری کے گھر میں آنکھ کھولی اور وہ ان کے اکلوتے صاحبزادے ہیں۔ آصف علی زرداری نے اپنی 16 سالہ زندگی میں کئی عروج و زوال دیکھے ابتدائی تعلیم کراچی کے نجی اسکول سے حاصل کی اور کیڈٹ کالج پٹارو سے 1972 میں گریجویٹ کیا۔ پولو اور باکسنگ کے شوقین آصف زرداری نے بچپن میں فلم سالگرہ میں بھی بطور چائلڈ ایکٹر اداکاری کے جوہر دکھائے۔

آصف علی زرداری اس وقت سب کی توجہ کا منظر بنے جب 1987 میں ان کی شادی سابق وزیراعظم ذوالفقار علی بھٹو کی صاحبزادی بے نظیر بھٹو سے ہوئی جس کے بعد 1988 میں بے نظیر ملک کی پہلی خاتون وزیراعظم منتخب ہوئیں اور دو سال بعد ہی صدر غلام اسحاق خان نے ان کی حکومت کرپشن کے الزامات پرتحلیل کردی جب کہ منتخب حکومت کا تختہ الٹنے پر آصف علی زرداری کو شدید تنقید کا سامنا رہا۔

بے نظیر بھٹو کے دوسرے دور حکومت میں آصف علی زرداری نے وفاقی وزیربرائے سرمایہ کاری اور پاکستان انوائرومینٹل پروٹیکشن کے چیئرپرسن کی حیثیت سے خدمات انجام دیں۔ بے نظیر بھٹو کے بھائی مرتضی بھٹو کے قتل اور کرپشن کے الزامات پر آصف علی زرداری کو جیل بھی جانا پڑا اور 2004 میں جیل سے رہائی کے بعد وہ خودساختہ جلاوطنی پر دبئی چلے گئے۔

دسمبر2007 میں بے نظیر بھٹو کی انتخابی جلسے کے بعد فائرنگ کے نتیجے میں شہادت کے بعد آصف علی زرداری اپنی جلاوطنی ختم کرنے کے بعد وطن واپس آئے اور سیاست میں براہ راست سرگرم ہوتے ہوئے پیپلزپارٹی کے شریک چیئرمین بنے جس کے بعد وہ 9 ستمبر 2008 کو صدر مملکت کے منصب پرفائر ہوئے اور کئی چیلنجز کا سامنا کرنے کے باوجود آصف علی زرداری کو یہ اعزاز حاصل ہے کہ وہ واحد پاکستانی صدر ہیں جنہوں نے اپنی آئینی مدت پوری کی۔

آصف علی زرداری کی صاحبزادی آصفہ اور بختاور نے سماجی رابطے کی ویب سائٹ ٹوئٹر پر اپنے والد کے لئے نیک خواہشات کا اظہار کیا ہے۔

Patience with every allegation @AAliZardari rather be criticised by today's media & vindicated by history. Happy Bday to the bravest ❤️ #61
— Bakhtawar B-Zardari (@BakhtawarBZ) July 25, 2016