کراچی کے مختلف علاقوں میں بارش متعدد فیڈرز ٹرپ کرگئے

کے الیکٹرک کے 600 سے زائد فیڈرز اور 21 گرڈ اسٹیشن ٹرپ کرگئے، دھابیجی، پپری اور گھارو پمپنگ اسٹیشن پر بریک ڈاؤن۔ فوٹو؛ ایکسپریس/ محمد نعمان

---

MINGORA: شہر میں بارش سے موسم خوشگوار ہوگیا جب کہ کے الیکٹرک کے 600 سے زائد فیڈرز اور 21 گرڈ اسٹیشن ٹرپ کرنے سے شہر کا 40 فیصد حصہ بجلی سے محروم ہوگیا۔

کراچی کے مختلف علاقوں نیو کراچی، نارتھ کراچی، گلبرگ، ایف بی ایریا، آئی آئی چند ریگر روڈ، صدر، ایم اے جناح روڈ، اولڈ سٹی ایریا، شاہ فیصل، ملیر، ایئرپورٹ، شاہراہ فیصل، ڈیفنس اور قیوم آباد سمیت مختلف علاقوں میں ہلکی تیز بارش ہوئی جس سے موسم خوشگوار ہوگیا، بارش سے شہر میں ٹھنڈی ہوائی چلنے لگیں اور کالی گھٹاؤں نے بسیرا کرلیا۔

کراچی کے خوشگوار موسم کا مزہ لینے کے لیے شہریوں کی بڑی تعداد باہر نکل آئی جب کہ موسم کا لطف اٹھانے کے لیے شہریوں نے ساحل سمندر کا بھی رخ کیا تاہم شہر میں بارش سے ایک بار پھر شہریوں کو پریشانی کا سامنا کرنا پڑا، کئی علاقوں میں تیز بارش سے پانی جمع ہوگیا جب کہ شہر کی مرکزی شاہراہوں پر شدید ٹریفک جام ہوگیا جس سے گاڑیوں کی لمبی قطاریں لگ گئیں۔

بارش سے سڑکوں پر پھسلن کے باعث کئی مقامات پر موٹرسائیکل سواروں کے سلپ ہونے کے واقعات بھی سامنے آئے ہیں جس سے بعض موٹرسائیکل سوار افراد معمولی زخمی بھی ہوئے۔

دوسری جانب شہر میں بارش کا آغاز ہوتے ہی بجلی کی آنکھ مچولی شروع ہوگئی، کے الیکٹرک کے 600 سے زائد فیڈرز اور 21 گرڈ اسٹیشن ٹرپ کر گئے جس سے لانڈھی،کورنگی، ملیر، شاہ فیصل کالونی، قیوم آباد اور صدر سمیت کئی علاقے اندھیرے میں ڈوب گئے۔ کراچی ایئرپورٹ کے جناح ٹرمینل پر بھی بجلی کی فراہمی معطل ہوگئی جس سے ایئرپورٹ کی عمارت تاریکی میں ڈوب گئی۔ اس کے علاوہ دھابیجی، گھارو اور پپری واٹر پمپنگ اسٹیشن پر بجلی کا بریک ڈاؤن ہوگیا جس سے شہر کو 7 کروڑ گیلن پانی کی فراہمی متاثر ہوئی ہے۔

ادھر شہر میں بارش سے کرنٹ لگنے کے واقعات میں 3 افراد جاں بحق ہوگئے۔ ذرائع کےمطابق لیاری کھڈا مارکیٹ، کورنگی اور گلستان جوہر میں کرنٹ لگنے سے 3 افراد جاں بحق ہوگئے۔