تجارت اورصنعت کی وزارتوں کے درمیان پرانی گاڑیوں کی درآمد پراختلافات

ری کنڈیشن وہیکلزکا چور دروازہ بند ہونا چاہیے،خرم دستگیر،گاڑیوں کی درآمد پر مکمل پابندی کامطالبہ

اظہر جتوئی August 09, 2016

ری کنڈیشن وہیکلزکا چور دروازہ بند ہونا چاہیے،خرم دستگیر،گاڑیوں کی درآمد پر مکمل پابندی کامطالبہ: فوٹو: فائل

BAHAWALPUR: ری کنڈیشن گاڑیوں کی درآمد پر وزارت تجارت اور وزارت صنعت و پیداوار میں ایک مرتبہ پھر اختلافات کھل کر سامنے آگئے ہیں.

وزارت تجارت نے ری کنڈیشن گاڑیوں کی درآمد پر مکمل پابندی کامطالبہ کردیا ہے مگر انجینئرنگ ڈیولپمنٹ بورڈ کا کہنا ہے کہ ری کنڈیشن گاڑیوں کی کمرشل درآمد پر پابندی ہے، صرف گفٹ اسکیم کے تحت گاڑیاں منگوائی جا رہی ہیں۔

اس ضمن میں وفاقی وزیر تجارت خرم دستگیر نے ''ایکسپریس'' سے گفتگو کرتے ہوئے کہا ہے کہ غیرملکی سرمایہ کاری ری کنڈیشن گاڑیوں کی درآمد کی وجہ سے رکی ہوئی ہے کیونکہ ملک میں آٹو سیکٹر میں سرمایہ کاری کرنے والی غیر ملکی کمپنیوں کا مطالبہ ہے کہ ری کنڈیشن گاڑیوں کی درآمد پر پابندی عائد کی جائے تاکہ ملک میں ڈیمانڈ پیدا ہو سکے اور آٹو سیکٹر کی ڈیمانڈ ری کنڈیشن گاڑیوں سے پوری ہو رہی ہے۔ وفاقی وزیر کا کہنا تھا کہ ری کنڈیشن گاڑیوں کا چور دروازہ بند ہونا چاہیے۔

دوسری طرف وزارت صنعت و پیداوار کے ذیلی ادارے اور آٹو پالیسی پر عملدرآمد کرانے کے ذمے دار انجیئرنگ ڈیولپمنٹ بورڈ کے چیف ایگزیکٹو چوہدری طارق نے ''ایکسپریس'' سے گفتگو کرتے ہوئے بتایاکہ آٹو پالیسی پر یکم جولائی سے عملدرآمد شروع ہوگیا ہے، نئی آٹو پالیسی میں ری کنڈیشن گاڑیوں کی درآمد پر پابندی عائد کی گئی ہے، صرف گفٹ اسکیم کے تحت گاڑیاں درآمد کی جارہی ہیں۔ انہوں نے بتایا کہ نئی آٹو پالیسی سے سرمایہ کاری نہیں رکی بلکہ غیرملکی سرمایہ کاری کیلیے کئی سرمایہ کاروں نے رابطہ کیا، امید ہے جلد ہی غیر ملکی سرمایہ کاری اس سیکٹر میں آئے گی۔