قاہرہ صدارتی محل کا گھیراؤ صدر محمد مرسی نے محل چھوڑدیا

مصر میں ہزاروں مظاہرین نے صدارتی محل کا گھیراؤ کرلیا جس کے بعد صدر محمد مرسی صدارتی محل چھوڑ کر نامعلوم مقام پر منتقل ہوگئے ہیں۔


غیر ملکی خبر رساں ایجنسی کے مطابق قاہرہ میں حزب اختلاف کی جماعتوں کے مظاہروں نے شدت اختیار کرلی ہے۔ صدارتی محل کی سیکیورٹی پر مامور ذرائع نے تصدیق کی ہے کہ صدر محمد مرسی نے محل چھوڑ دیا ہے۔

صدر مرسی نے حال ہی میں اپنے اختیارات وسیع کرنے کا حکم جاری کیا تھا جس کے تحت عدالت کے آئین ساز اسمبلی کو ختم کرنے کے اختیار پر قدغن لگائی گئی تھی۔ اس حکم نامے کے بعد حزب اختلاف کی جماعتوں اور انسانی حقوق کی تنظیموں نے مصر کے صدر کو شدید تنقید کا نشانہ بنایا اور پورے ملک میں ان کے خلاف مظاہرے شروع ہوگئے۔