پاکستان مقبوضہ کشمیرمیں بدامنی پھیلا رہا ہے بھارتی وزیرداخلہ کا الزام

بھارتی وزیر داخلہ راج ناتھ سنگھ نے اپنی توپوں کا رخ ایک مرتبہ پھرپاکستان کی طرف کرتے ہوئے کہا ہے کہ وہ مقبوضہ کشمیرمیں بدامنی میں ملوث ہے۔


بھارتی میڈیا کے مطابق وزیرداخلہ راج ناتھ سنگھ نے اترپردیش کے علاقے شاہ جہان پور میں یوم آزادی کے حوالے سے منعقدہ تقریب سے خطاب کرتے ہوئے کہا کہ ہمیں صرف کشمیر کی سرزمین سے ہی محبت نہیں، ہمیں کشمیر کے لوگوں سے بھی محبت ہے۔ راج ناتھ سنگھ کا کہنا تھا کہ پاکستان چاہتا ہے کہ ہمارا کشمیر 2 حصوں میں تقسیم ہو جائے اسی لیے وہ یہاں عدم استحکام پیدا کرنے کی کوششیں کر رہا ہے۔ ہم کشمیری نوجوانوں کے ہاتھوں میں اسلحے اور پتھروں کے بجائے قلم اورکمپیوٹر دیکھنا چاہتے ہیں۔

بھارتی وزیرداخلہ کا کہنا تھا کہ احتجاج مسئلے کا حل نہیں، پہلے وادی میں امن قائم ہو اس کے بعد ہی ہم کوئی حل تلاش کر سکتے ہیں، سارک ورزا داخلہ کانفرنس میں شرکت کا حوالہ دیتے ہوئے راج اتھ سنگھ نے کہا کہ پاکستان میں میں نے واضح طور پر کہا کہ دہشت گرد دہشت گرد ہی ہوتا ہے اسے ہیرونہیں بنایاجا سکتا۔