قومی پرچم کی بے حرمتی چمن میں پاک افغان سرحد تیسرے روز بھی بند

پاک افغان سرحد پرتیسرے روز بھی ہر قسم کی آمدروفت ،تجارتی سرگرمیاں ، افغان ٹرانزٹ ٹریڈ اور نیٹو سپلائی معطل ہیں : فوٹو : فائل

---

پاک افغان سرحد تیسرے روز بھی بند ہونے سے ہزاروں افراد کی نقل و حرکت اور کاروباری سرگرمیاں معطل ہوگئی ہیں۔

ایکسپریس نیوز کےمطابق 19 اگست کو افغان فورسز کے سامنے افغان شہریوں کی جانب سے پاکستانی پرچم کی بے حرمتی اور باب دوستی پر پتھراؤ کے بعد بند کیا جانے والا باب دوستی تیسرے روز بھی بدستور بند ہے۔ جبکہ پاک افغان چمن سرحد پر افغانستان اور پاکستان کے درمیان کشیدگی برقرار ہے۔

اس خبرکوبھی پڑھیں: بلوچستان میں بھارتی پرچم نذرآتش کرنے پرافغان شہریوں کا پاک افغان بارڈر پراحتجاج

گزشتہ روزپاکستان اورافغانستان کے سیکیورٹی حکام کے درمیان چمن سرحد کے 'باب دوستی' کو دوبارہ کھولنے کے حوالے سے فلیگ میٹنگ بغیر کسی نتیجے کے ختم ہوگئی تھی جس کے باعث سرحد پر تیسرے روز بھی ہر قسم کی آمدروفت ،تجارتی سرگرمیاں ، افغان ٹرانزٹ ٹریڈ اور نیٹو سپلائی معطل ہیں جس کے باعث دونوں اطراف گاڑیوں کی لمبی قطاریں لگ گئی ہیں اور دونوں اطراف کے عوام کو شدید مشکلات کا سامنا ہے ۔

اس خبرکو بھی پڑھیں: پاک افغان سرحد پردہشت گردوں کی نقل وحرکت پرنظررکھنے کے لئے آپریشن شروع

دوسری جانب سرحد کی دونوں جانب سبزی اور پھلوں سے لدے ٹرک بھی کھڑے ہوگئے ہیں جس سے تاجر شدید پریشانی میں مبتلا ہیں۔ تاجروں کا کہنا ہے کہ پاک افغان تنازعہ کو تجارت پر اثر انداز نہ ہونے دیا جائے اورتجارتی سرگرمیوں کے بحال کیا جائے تاکہ تاجروں اور عوام کو پریشانی کا سامنا نہ کرنا پڑے۔