ٹریفک حادثات و دیگر واقعات میں 3افراد ہلاک

گاڑیوں کی ٹکر سے اکرم،ابرارشاہ جبکہ شمیم بانو ٹینک میں ڈوب کر ہلاک ہوئی (فوٹو فائل)

---

شہر کے مختلف علاقوں میں ٹریفک حادثات و دیگر واقعات میں خاتون سمیت3افراد ہلاک ہوگئے،تفصیلات کے مطابق سائٹ اے تھانے کی حدود میٹروول غنی چورنگی باب خیبر کے قریب نامعلوم تیز رفتار گاڑی کی ٹکر سے35سالہ اکرم خان ولد رمیز خان جاں بحق ہوگیا جس کی لاش سول اسپتال لائی گئی

پولیس نے لاش کو ضابطے کی کارروائی کے بعد ورثا کے حوالے کردیا، گلستان جوہر تھانے کی حدود لال فلیٹ گلستان جوہر کے قریب نامعلوم گاڑی کی ٹکر سے23سالہ ابرار شاہ ولد شبیر شاہ ہلاک ہوگیا، پولیس کے مطابق متوفی گلستان جوہر پہلوان گوٹھ کا رہائشی تھا، سولجر بازار تھانے کی حدود سولجر بازار نمبر3تھانے کے قریب واقع مکان کے زیر زمین پانی کے ٹینک میں50سالہ شمیم بانو زوجہ الطاف گر گئی اور پانی میں ڈوب کر ہلاک ہوگئی،

ایس ایچ او سولجر بازار عرفان کوبرا نے بتایا کہ متوفیہ گھر کے اندر پانی کے ٹینک میں ڈوب کر ہلاک ہوئی،واقعہ اتفاقی تھا، انھوں نے بتایا کہ متوفیہ کا ذہنی توازن ٹھیک نہیں تھا۔