قائد ایم کیو ایم نے تمام اختیارات رابطہ کمیٹی کے سپرد کر دیئے

قائد  نے تنظیم سازی، فیصلہ سازی اور پالیسی سازی کے مکمل اختیارات رابطہ کمیٹی کے سپرد کر دیئے۔ فوٹو: فائل

---

متحدہ قومی موومنٹ کے قائد نے پارٹی کے تمام اختیارات رابطہ کمیٹی کے سپرد کرنے کا اعلان کردیا۔

ایم کیو ایم کی ویب سائٹ پر جاری بیان میں کہا گیا ہے کہ متحدہ قائد نے پارٹی رہنماؤں کے فیصلے کا احترام کرتے ہوئے بحیثیت قائد تنظیم سازی، فیصلہ سازی اور پالیسی سازی کے مکمل اختیارات رابطہ کمیٹی کے سپرد کر دیئے ہیں۔ الطاف حسین نے ایم کیوایم کے تمام منتخب نمائندوں، ذمہ داروں اور کارکنوں کو ہدایت کی ہے کہ وہ تحریک کی بہتری کے لئے رابطہ کمیٹی کے ہاتھ مضبوط کریں۔

اس خبر کو بھی پڑھیں: فاروق ستار نے ایم کیوایم کی کمان سنبھال لی

ویب سائٹ پر جاری بیان کے مطابق الطاف حسین کا کہنا ہے وہ اپنی صحت پر خصوصی توجہ دیں گے کیونکہ پے درپے افسوسناک خبروں اور رات دن کی تنظیمی مصروفیات کی وجہ سے میں شدید ذہنی تناؤ کا شکار اور اپنی صحت پر توجہ دینے سے قاصر تھے۔ ایم کیو ایم قائد نے بیان میں اپنی تقریر کے پاکستان کے عوام کی دل آزاری پر ایک بار پھر معذرت بھی کی۔

واضح رہے کہ گزشتہ روز ایم کیو ایم کے ڈپٹی کنوینر فاروق ستار کا کہنا تھا کہ جب متحدہ قومی موومنٹ پاکستان کی جماعت ہے تو اس کا انتظام بھی پاکستان سے ہی چلایا جائے گا، اگر ذہنی تناؤ یا کسی بھی وجہ سے پارٹی قائد پاکستان مخالف' بیانات دے رہے ہیں تو پہلے یہ معاملہ حل ہونا چاہیئے۔