گندم کی درآمد پر ڈیوٹی مزید بڑھا کر60 فیصد کرنے کی سفارش

امپورٹڈگندم سستی ہونے کے باعث سرمایہ کارباہر سے منگواسکتے ہیں، قازقستان سے درآمد کی اطلاعات ہیں،وزارت قومی تحفظ خوراک

اظہر جتوئی August 26, 2016

ملک میں ضرورت سے زائدگندم موجود ہے،درآمدکی حوصلہ شکنی کیلیے ڈیوٹی40 سے 60 فیصد کردی جائے، وزارت تجارت کو خط فوٹو : فائل

وزارت قومی تحفظ خوراک نے گندم درآمدکرنے کی حوصلہ شکنی کے لیے ایک بار پھر ڈیوٹی میں اضافے کی سفارش کردی۔

وزارت تجارت کو لکھے گئے خط میں وزارت قومی تحفظ خوراک کی طرف سے کہا گیا ہے کہ اس وقت ملک بھر میں 9.923 ملین ٹن گندم کا اسٹاک موجود ہے جو ملکی ضروریات سے بھی زیادہ ہے جب کہ ملک میں گندم کے نرخ بھی عالمی مارکیٹ سے زیادہ ہیں اس لیے اطلاعات ہیں کہ بعض عناصر قازقستان سے گندم درآمد کر رہے ہیں، خدشہ ہے کہ ملک میں کم ڈیوٹی کا فائدہ اٹھا کر سرمایہ کار باہر سے گندم درآمد نہ کرنا شروع کر دیں، اس چیز کے پیش نظر گندم کی درآمدی ڈیوٹی میں اضافہ کیا جائے تاکہ اگر کوئی گندم درآمد کرنا چاہتا ہے تواسے پاکستانی ریٹس کے برابر نرخ ادا کرنا پڑیں۔ اس وقت ملک میں گندم کی درآمد پر 40 فیصد درآمدی ڈیوٹی نافذ ہے۔

دستاویز کے مطابق وزارت قومی تحفظ خوراک وتحقیق نے تجویز دی ہے کہ گندم کی درآمدی ڈیوٹی 60 فیصد کی جائے،رواں سال کے اوائل میں وزارت قومی تحفظ خوراک کی تجویز پر درآمدی ڈیوٹی 25 فیصد سے بڑھا کر 40فیصد کی گئی تھی۔ یاد رہے کہ وفاقی حکومت ملک میں وافر اسٹاک اور زائد قیمت کی وجہ سے گندم کی برآمد پر بھی سبسڈی دے رہی ہے تاکہ ایکسپورٹرز کو نقصان نہ ہو اور گندم کی آئندہ فصل آنے سے قبل گوداموں کو خالی کیا جا سکے۔وزارت تحفظ خوراک کے حکام کے مطابق ڈبلیوٹی او کی وجہ سے پاکستان گندم کی درآمد پر پابندی عائد نہیں کر سکتا اس لیے اس پر درآمدی ڈیوٹی عائد کرکے مقامی پیداوار کو تحفظ دیا جا رہا ہے۔