بھارتی اداکار نواز الدین صدیقی نے ’’شارٹ‘‘ بیچنا شروع کردیئے

بھارتی شہر حیدر آباد دکن میں شارٹ بیچتے ہوئے نواز الدین کے ساتھ سلمان خان کے بھائی ارباز خان بھی موجود تھے۔

ویب ڈیسک August 26, 2016

بھارتی شہر حیدر آباد دکن میں شارٹ بیچتے ہوئے نواز الدین کے ساتھ سلمان خان کے بھائی ارباز خان بھی موجود تھے۔ فوٹو؛ فائل

بالی ووڈ کے سپر اسٹار نواز الدین صدیقی نے اپنی نئی آنے والی فلم ''فریکے علی'' کی تشہیر کے لیے شارٹ بیچنا شروع کردیئے۔

بالی ووڈ اسٹار نواز الدین صدیقی نے انتھک محنت اور جاندار اداکاری کے باعث فلم نگری میں جگہ بنائی اور متعدد بلاک بسٹر فلموں میں اداکاری کے جوہر دکھائے ہیں جس میں کئی صف اول کے اداکار شامل تھے لیکن اب یہی نامور اداکار شارٹ بیچتے ہوئے نظر آئے ہیں۔

نواز الدین صدیقی کی ایک ویڈیو سوشل میڈیا پر تیزی سے وائرل ہورہی ہے جس میں انہیں بھارتی شہر حیدر آباد دکن کے بازارمیں شارٹ بیچتے ہوئے دیکھا جاسکتا ہے جب کہ شارٹ بیچتے ہوئے نواز الدین کے ساتھ سلمان خان کے بھائی ارباز خان بھی موجود ہیں جو ان کی مدد کررہے ہیں۔ اداکار نواز الدین صدیقی کے مداحوں کو ویڈیو پر پریشان ہونے کی ضرورت نہیں کیوں کہ اداکار اپنی نئی آنے والی فلم ''فریکے علی''میں اپنے کردار سے لوگوں کو محظوظ کرتے ہوئے فلم کی تشہیر کررہے ہیں۔

واضح رہے کہ نواز الدین نے فلم ''فریکے علی'' میں شارٹ بیچنے، چور اور گالف کے کھلاڑی کا کردار ادا کیا ہے جب کہ فلم 9 ستمبر کو سنیما گھروں کی زینت بنے گی۔