فریضۂ قربانی اورنام و نمود کا چلن

سیدنا ابراہیم ؑ نے جس ماحول میں آنکھ کھولی وہ پوری طرح شرک و کفر کی دبیز چادر میں لپٹا ہوا تھا

راحیل گوہر September 02, 2016

سیدنا ابراہیم ؑ نے جس ماحول میں آنکھ کھولی وہ پوری طرح شرک و کفر کی دبیز چادر میں لپٹا ہوا تھا : فوٹو:فائل

سیدنا ابراہیم علیہ السلام کو اﷲ سبحانہ تعالیٰ نے قلب سلیم سے نوازا تھا۔ آپؑ کی پوری زندگی ابتلا و آزمائش سے عبارت ہے۔ آپؑ کی حیات طیبہ میں آزمائشوں و امتحانات کا سورج نصف النہار پر رہا۔ قرآن حکیم میں اﷲ نے اپنے اس بندے کی آزمائشوں کا نقشہ کچھ یوں کھینچا گیا ہے '' اور جب ابراہیم کو ان کے رب نے کئی باتوں میں آزمایا تو ان پر پورے اترے'' (البقرہ)

دراصل اس دنیوی زندگی کی تو غرض و غایت ہی امتحان ہے۔ ارشاد باری تعالیٰ ہے '' (اﷲ) وہ ہی ہے جس نے موت اور زندگی کو اس لیے پیدا کیا کہ تمہیں آزمائے کہ تم میں کون بہتر عمل کر نے والا ہے۔'' (الملک)

اس کائنات میں تمام بنی نوع آدم کی ظاہری اور معنوی فوز و فلاح اور نجات اخروی، رب کائنات کی حقیقی معرفت، اس کی رضا و خوش نودی میں مضمر ہے۔ چناں چہ خالق کائنات نے انسان کو سمع و بصر، عقل و فہم اور فراست و دانش مندی کی استعداد و صلاحیتوں سے بہرہ مند فرما کر ابتلا و آزمائش کی بھٹی میں جھونک دیا، تاکہ کھرا ا ور کھوٹا سامنے آجائے۔ ایک طرف معبود حقیقی کی محبت و پرستش کا تقاضا ہے تو دوسری جانب اس دنیا کی زیب و زینت، مرغوباتِ نفس، عیش و طرب کے دل آویز مواقع اور طاؤس و رباب کی سحر انگیزیاں دامن گیر ہوتی ہیں، اب اس رسہ کشی کا زور کس طرف زیادہ ہوتا ہے اور انسان کس جانب کھنچتا چلا جا تا ہے، بس یہی انسان کا اصل امتحان ہے۔

سیدنا ابراہیم ؑ نے جس ماحول میں آنکھ کھولی وہ پوری طرح شرک و کفر کی دبیز چادر میں لپٹا ہوا تھا۔ بت پرستی، ستارہ پرستی اور مظاہر پرستی کا ایک ایسا فسوں طاری تھا کہ جس کے زیراثر ان کی قوم حق و باطل کی تمیز ہی کھو بیٹھی تھی۔ ملک میں ایک مطلق العنان اور مشرک بادشاہ مسلط تھا، جو خدائی کا دعوے دار تھا، گویا عقائد کا شرک اور اس کا عملی ظہور دونوں عروج پر تھے۔ فسق و فجور کی اس گھٹا ٹوپ تاریکی میں نور توحید کا کوئی ٹمٹماتا ہوا دیا بھی تاحد نگاہ نظر نہ آتا تھا۔

کفر و الحاد اور تقلیدِ آبا و اجداد کے اس ماحول میں سیدنا ابراہیمؑ نے اﷲ کی طرف سے ودیعت کی ہوئی حق کی بصیرت اور رشد و ہدایت کی روشنی میں ایک نعرۂ حق بلند کیا کہ '' بلاشبہ میں نے اپنا چہرہ اسی کی طرف پھیر لیا ہے، جس نے آسمانوں اور زمین کو پیدا کیا اور میں مشرکین میں نہیں ہوں '' (الانعام) اس نعرے کی گونج اس معبود باطل کے ایوانوں سے ٹکرائی تو ایک ہل چل مچ گئی۔ کفر و الحاد کے اس بحر مردار میں جوار بھاٹا آگیا اور دوسری طرف ابراہیمؑ کو فراست و دانش مندی کے اس امتحان میں سرخ روئی حاصل ہوگئی۔ لیکن ابھی عشق کے امتحان اور بھی ہیں کے مصداق ابراہیمؑ کے لیے صبر و ثبات، عزیمت و استقامت، صعوبتوں، کٹھنائیوں اور غیرمتزلزل ایمان و یقین کا کڑا امتحان سامنے تھا۔

ایک طرف گم راہیوں اور شرک کی کثافتوں میں لتھڑا پورا معاشرہ تھا، جس کی جڑیں اس بھٹکی ہوئی قوم کی فکر و نظر میں پیوستہ تھیں اور دوسری طرف یک و تنہا انسان دنیاوی وسائل و ذرائع سے محروم۔ لیکن جب قوت ایمانی، مصمم ارادہ اور جذبۂ جنوں اور ذوق یقین دل میں جاگزیں ہو تو فولادی زنجیریں بھی کٹ جاتی ہیں اور راہ میں آئے ہوئے پہاڑ بھی خس و خاشاک کی مانند بہہ جاتے ہیں۔

سیدنا ابراہیمؑ کے عقیدۂ توحید کی مضبوطی اور اس کے بہ بانگ دہل پرچار نے پوری قوم کو غیظ و غضب کی آگ میں جھلسا دیا اور اپنی ذلت آمیز شکست پر اس نظام باطل کے ٹھیکے داروں نے کھسیانی بلی کھمبا نوچے کے مصداق اﷲ کے اس دوست کو آگ میں زندہ جلا دینے کا فیصلہ کرلیا۔ لیکن زندگی سے محروم کردینے والی اس لرزہ خیز خبر سے بھی اس بطل جلیل کے پائے استقلال میں کوئی لرزش واقع نہ ہوئی۔ محبت الٰہی کی اس بلند پروازی اور جذب و آگہی کی اس کیفیت پر عقل بھی حیران و ششدر رہ گئی۔

آگ کے دہکتے ہوئے ایک الاؤ میں ابراہیمؑ کو پھینک دیا گیا۔ لیکن صداقت آمیز محبت اور عرفان الٰہی کی انوار و برکات کی بارش نے دہکتے الاؤ کو ٹھنڈک اور سلامتی والا سبزہ زار بنا دیا۔ حکم الٰہی ہوا '' اے آگ ! ٹھندی اور سلامتی والی بن جا ابراہیم ؑ پر'' (الانبیاء)

اس کے بعد سیدنا ابراہیمؑ نے اپنے گھر، خاندان، دوست اور اپنے آبا و اجداد کی سرزمین کو خیرباد کہا اور ایک انجانی منزل کی جانب گام زن ہوگئے، اپنے خالق و مالک اور منعم حقیقی پر بھروسا کرتے ہوئے کہ '' حکم راں ہے اک وہی، باقی بتانِ آزری'' شام، مصر، شرق اردن اور حجاز آپؑ کی دعوت و توحید کا مرکز و محور رہے۔ بس ایک ہی سودا سر میں سمایا ہوا تھا کہ توحید کا کلمہ دنیا کے ہر گوشے میں پھیل جائے۔

سیدنا ابراہیمؑ کی دعوتِ توحید کی اس بھاگ دوڑ میں ایک وقت ایسا بھی آیا جب اپنی زندگی کی محدودیت اور اپنے مشن کی لامحدودیت کا احساس دل میں جاگا تو بے اختیار یہ دعا نوک زبان پر آگئی۔ '' اے میرے رب! مجھے نیک اور صالح اولاد عطا فرما'' (الصافات)

چناں چہ ستاسی برس کی عمر میں اﷲ نے ایک نیک اور صالح بیٹا عطا کیا۔ لیکن جب یہ بیٹا بچپن گزار کر جوانی کی سرحد میں داخل اور اس قابل ہوا کی باپ کے جاری کیے ہوئے اس مشن میں ان کا دست و بازو بنے، کہ ایک اور قول ثقیل باپ پر نازل ہوا کہ '' اپنے لخت جگر کو اﷲ کی راہ میں قربان کردو'' مگر جس کی پوری زندگی آزمائشوں کی چکیوں میں پستے گزری ہو، اس حکم پر اس کے پا ئے ثبات میں بھلا کوئی لرزش کیسے آسکتی تھی۔ جب کہ دوسر ی جانب بیٹا بھی انتہائی سعادت مند ثابت ہوا، اور اس حکم الٰہی کو سن کر باپ سے بولا ابا جان! کر گزریے جو کچھ آپ کو حکم دیا جا رہا ہے، انشاء اﷲ آپ مجھے صبر کرنے والوں میں پائیں گے۔

اور پھر چشم فلک نے یہ نظارہ دیکھا کہ بوڑھے باپ نے اپنے جواں سال بیٹے کو منہ کے بل زمین پر لٹایا اور بے دریغ گلے پر چھری پھیر دی۔ اﷲ کی رحمت جوش میں آئی اور بیٹے کی جگہ ایک مینڈھا ذبح ہوگیا۔ اﷲ کی منشا بیٹے کی جان لینا نہیں بل کہ باپ کا امتحان مقصود تھا اور یہ شاید آخری اور کڑا امتحان تھا۔ بہ ہر حال بیٹے کی جگہ مینڈھے کی قربانی بہ طور فدیہ قبول ہوئی اور اس کی یادگار میں وقوع قیامت تک جانوروں کی قربانی کا یہ سلسلہ دراز کر دیا گیا۔

یہ ہے حبِ الٰہی اور اطاعت و فرماں برداری کی ایک چشم کشا تصویر اور ایمان و یقین کی گہرائی کے ساتھ تصدیق بالقلب کی صحیح تعبیر۔

زید بن ارقمؓ سے ایک حدیث مروی ہے کہ رسول کریم ﷺ سے دریافت کیا گیا اے اﷲ کے رسول ﷺ! ان قربانیوں کی حقیقت کیا ہے؟ آپؐ نے ارشاد فرما یا: '' یہ تمہارے باپ ابراہیم علیہ السلام کی سنّت ہے''
( مسند احمد، ابنِ ماجہ)

گویا جانوروں کی یہ قربانیاں دراصل علامت ہیں امت مسلمہ کی اطاعت و فرماں برداری اور تسلیم و رضا کی۔ یہی وجہ ہے کہ قرآن حکیم میں اس قربانی کی اصل غرض غایت یہ بیان کی گئی ہے '' اﷲ کو قربانیوں کے گوشت پہنچتے ہیں اور نہ ان کے خون بل کہ اسے تو تمہارے دل کی پرہیز گار پہنچتی ہے'' (الحج)

افسوس کہ اس مادہ پرستی کے دور میں ہر عبادت اور ہر سنت ایک رسم بن کر رہ گئی ہے۔ قربانی جیسے مقدس فریضے کو بھی امت کے سواد اعظم نے محض ایک رسم بنا کر رکھ دیا ہے۔ اس میں بھی سنت ابراہیمی کی اصل روح کو زندہ کرنے کے بجائے ہم اپنی ناک اونچی رکھنے کی زیادہ فکر کرتے ہیں کہ کہیں ایسا نہ ہو کہ ہمارا ہمسایہ ہم سے زیادہ منہگا اور جاذب نظر جانور لے آئے، اب تو موبائل فون اور کیمرے میں جانور کی عکس بندی بھی کی جا تی ہے تاکہ جس نے قربانی سے پہلے ہمارا جانور نہ دیکھا ہو وہ کم از کم تصویر ہی دیکھ لے۔ اپنے اسی طرز عمل سے ہم خود اپنی عبادات کو ریا کاری اور تصنع کی بھینٹ چڑھا دیتے ہیں اور اس طرح عبادات اور ادائی سنت میں اخلاص، خدا ترسی اور حصول تقویٰ کے برخلاف دنیاوی برتری اور نام و نمود ہمارا مزاج بن گیا ہے۔

تبصرے

کا جواب دے رہا ہے۔ X

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔

فریضۂ قربانی اورنام و نمود کا چلن

انٹرٹینمنٹ

اکشے کمار نے بگ باس 18 کے فائنل میں کیوں شرکت نہیں کی؟ وجہ سامنے آگئی

’کئی بار میرا حق چھینا گیا‘، کارتک آریان نے بالی ووڈ کی اقربا پروری پر برس پڑے

نیٹ فلکس پر دھوم مچانے والی 10 بہترین ویب سیریز اور فلمیں

رائے

اسپیشل انسان!

سامراج کا کھیل

ٹرمپ کی تقریبِ حلف برداری یا جشنِ تاجپوشی؟

متعلقہ

تازہ ترین

فریضۂ قربانی اورنام و نمود کا چلن

ہمارے ساتھ شامل ہوں

مقبول خبریں

انٹرٹینمنٹ

اکشے کمار نے بگ باس 18 کے فائنل میں کیوں شرکت نہیں کی؟ وجہ سامنے آگئی

’کئی بار میرا حق چھینا گیا‘، کارتک آریان نے بالی ووڈ کی اقربا پروری پر برس پڑے

نیٹ فلکس پر دھوم مچانے والی 10 بہترین ویب سیریز اور فلمیں

رائے

اسپیشل انسان!

سامراج کا کھیل

ٹرمپ کی تقریبِ حلف برداری یا جشنِ تاجپوشی؟

متعلقہ

تازہ ترین