ایم کیوایم کے اظہارالدین ایک بارپھر کراچی کے ضلع غربی کے چیئرمین بن گئے

الیکشن کمیشن کا ایم کیوایم کے امیدوارکی کامیابی سے متعلق پریذائیڈنگ افسر کے نتیجے کو بحال کرنے کا حکم۔ فوٹو:فائلز فوٹو: فائل

---

ضلعی میونسپل کارپوریشن کراچی غربی کے چیئرمین کی نشست ایک بار پھر مسلم لیگ (ن) کے ہاتھ سے نکل گئی۔ الیکشن کمیشن نے ریٹرننگ افسر کا فیصلہ کالعدم قرار دے کر ایم کیو ایم کے امیدواراظہارالدین کی کامیابی سے متعلق پریذائیڈنگ افسر کے نتیجے کو بحال کرنے کا حکم دے دیا۔

ایکسپریس نیوز کے مطابق کراچی غربی کے چیئرمین کی نشست میوزیکل چیئر میں تبدیل ہو کررہ گئی، 24 اگست کو کراچی کے ضلع غربی کی میونسپل کارپوریشن کا انتخاب متنازع حیثیت اختیار کر گیا۔ پہلے پہل پریذائڈننگ آفیسرنے ایم کیو ایم اور پی ٹی آئی کے امیدواروں کو چیئرمین اور وائس چیئرمین کو کامیاب قرار دینے کا اعلان کیا جس کے بعد ریٹرننگ آفیسر نے مسلم لیگ (ن) کے آصف خان کی کامیابی کا اعلان کردیا۔ اس صورتحال پر ایم کیو ایم کے مطالبے پر الیکشن کمیشن نے نتیجے کا نوٹیفکیشن روک لیا اور معاملہ سماعت کیلئے مقرر کردیا۔

چیف الیکشن کمشنر جسٹس ریٹائرڈ سرداررضا کی سربراہی میں ایم کیو ایم کے امیدوار اظہارالدین کی پٹیشن کی سماعت ہوئی جس کے بعد متحدہ کے وکیل نے میڈیا کو بتایا کہ الیکشن کمیشن نے کراچی غربی میں ریٹرننگ افسرکے فیصلے کو کالعدم قرار دے کر پریزائڈنگ افسر کے پہلے نتیجے کو بحال کرنے کاحکم دے دیا ہے۔