ضمنی الیکشن ٹریلر ہے اصل فلم انتخابات میں چلے گی نواز شریف

ن لیگ کے صدر میاں نوازشریف میلسی میں عوامی اجتماع سے خطاب کررہے ہیں۔ فوٹو: این این آئی

---

مسلم لیگ (ن) کے صدر سابق وزیر اعظم نواز شریف نے کہا ہے کہ سب مل کر بھی ضمنی الیکشن میں (ن) لیگ کو شکست نہیں دے سکے، یہ نتائج ٹریلر ہے، اصل فلم تو آئندہ انتخابات میں چلے گی۔

شیر جلد آنیوالا ہے۔ مسلم لیگ (ن) ضرور کامیابی حاصل کرے گی، جمعہ کو میلسی میں جلسے سے خطاب کرتے ہوئے انھوں نے کہا کہ اللہ نے ہمیں دوبارہ موقع دیا تو قوم خوشحال ہو گی، بچے ہمارے اچھے اسکولوں میں پڑھ رہے ہونگے، لوڈشیڈنگ کا خاتمہ ہو جائیگا، اس وقت ہمارا ملک قرضوں میں جکڑا ہوا ہے، ملک بچانے کیلئے قوم مسلم لیگ (ن)کو ضرور لائے گی۔ عوام جانتے ہیں بحرانوں سے ملک کو کون نکالے گا، انشاء اللہ یہ کام مسلم لیگ (ن)کریگی۔



انھوں نے کہا کہ ہماری حکومت گرائی نہ جاتی تو آج موٹر وے ملتان سے گزر رہی ہوتی، رحیم یار خان، کراچی، گوادر اور کوئٹہ تک موٹر وے بن گئی ہوتی، آج 36 گھنٹوں کے بعد لوگ ٹرین کے ذریعے کراچی پہنچتے ہیں، ہم بلٹ ٹرین کا پلان تیارکر رہے تھے اور وہ آٹھ گھنٹوں میں کراچی پہنچاتی اور میلسی سے لاہور دوگھنٹوں میں سفر طے ہوتا۔ ہمارے دور میں بچے سکول جاتے تھے، کوئی پریشانی نہیں ہوتی تھی، ترقی ہو رہی تھی، آج تو ادارے تباہ ہو گئے ہیں، کرپشن عروج پر پہنچ چکی ہے۔

ضمنی الیکشن میں سب مل کر بھی (ن ) لیگ کو شکست نہیں دے سکے، مسلم لیگ (ن) نے اکیلے سب کا مقابلہ کیا اور کامیابی حاصل کی۔ موقع ملا تو پاکستان کو دوبارہ تعمیر کرینگے، بلندیوں تک لے جائیں گے، عوام جانتے ہیں نواز شریف نے کیا کیا ہے؟۔ اللہ تعالیٰ کے فضل سے بہت کچھ کیا اور آگے بھی بہت کچھ کرینگے۔ 60سال میں اتنے قرضے نہیں تھے جتنے پچھلے4 سال میں بڑھ گئے ہیں۔ ہمارا منشور غریب آدمی کی قسمت بدل دے گا۔