ایم کیوایم کے رہنما فیصل سبزواری وطن واپس پہنچ گئے

کڑے وقت میں اپنی جماعت کا ساتھ دینے آیا ہوں، فیصل سبزواری فوٹو: فائل

---

ISLAMABAD: متحدہ قومی موومنٹ کے رہنما اور رکن سندھ اسمبلی فیصل سبز واری وطن واپس پہنچ گئے۔

متحدہ قومی موومنٹ کے رہنما فیصل سبزواری 6 ماہ بعد نجی ایئرلائن کی پرواز ای کے 602 کے ذریعے براستہ دبئی کراچی پہنچے جہاں ایئرپورٹ پر ان کا استقبال پارٹی رہنما خواجہ اظہار الحسن نے کیا۔ اس موقع پر میڈیا سے بات کرتے ہوئے فیصل سبزواری کا کہنا تھا کہ ایم کیو ایم نے ماضی میں بھی قربانیاں دیں اور اب بھی دے گی لہٰذا کڑے وقت میں اپنی جماعت کا ساتھ دینے آیا ہوں۔

فیصل سبزواری نے کہا کہ سیاست کرنا سب کا حق ہے اور ہمارا کام ہے کہ اپنی پارٹی کو مضبوط بنا کر شہر سے مسائل کا خاتمہ کرنا ہے۔

واضح رہے کہ ایم کیوایم کے رہنما فیصل سبز واری 6 ماہ قبل بیرون ملک چلے گئے تھے جب کہ ان کا کہنا تھا کہ میں سیکیورٹی خدشات کے باعث بیرون ملک گیا۔