کراچی کے مختلف علاقوں میں بوندا باندی سے موسم خوشگوار

شہر میں آئندہ 24 گھنٹے تک ہلکی بارش کا سلسلہ جاری رہ سکتا ہے، محکمہ موسمیات فوٹو: فائل

---

شہر کے مختلف علاقوں میں ہونے والی بوندا باندی سے موسم خوشگوار ہوگیا ہے تاہم عوام میں قربانی کے جانوروں کی صحت کے حوالے سے تشویش کی لہر دوڑ گئی ہے۔

کراچی میں گزشتہ دو روز سے بادلوں اور سورج کے درمیان آنکھ مچولی جاری تھی تاہم پیر کی صبح سے ہی مختلف علاقوں میں ہلکی بارش اور بوندا باندی کا سلسلہ جاری ہے۔

محکمہ موسمیات کا کہنا ہےکہ شہر میں آئندہ 24 گھنٹے تک ہلکی بارش کا سلسلہ جاری رہ سکتا ہے تاہم عید قرباں کے تینوں دن بارش کا امکان نہیں۔

شہر میں ہونے والی اس رم جھم نے جہاں عید کی چھٹی کا مزہ دوبالا کردیا ہے، وہیں عوام میں قربانی کے جانور کی صحت اور مناسب دیکھ بھال کے حوالے سے بھی تشویش کی لہر دوڑ گئی ہے۔