جیکب آباد میں نامعلوم افراد کی گھرمیں گھس کر فائرنگ 4 افراد جاں بحق

ہلاک ہونے والوں کی شناخت عبدالرشید ان کے دو بیٹے عنایت اللہ، ولی محمد اور پوتی سمیرا کے نام سے ہوئی ہے، پولیس : فوٹو : فائل

---

ISLAMABAD: کوٹ عبدالحمید میں مسلح افراد کی گھر میں گھس کر فائرنگ سے ایک ہی خاندان کے 4 افراد جاں بحق ہوگئے۔

ایکسپریس نیوز کے مطابق جیکب آباد میں نوازو جاگیرو کے نواحی گاؤں کوٹ عبدالحمید میں نامعلوم مسلح افراد نے عبدالرشید نامی شخص کے گھر میں اس وقت گھس کر فائرنگ کی جب تمام گھر والے سو رہے تھے۔ فائرنگ کے نتیجے میں عبدالرشید اور اس کے دو بیٹوں عنایت اللہ ، ولی محمد اور کم سن پوتی سمیرا موقع پر ہی جاں بحق ہوگئی۔

ایس ایس پی جیکب آباد ساجد حسین کا کہنا ہے کہ عینی شاہدین کے مطابق مسلح حملہ آوروں کی تعداد 12 سے زائد تھی۔ واقعہ بانبن برادری کے دو گروپوں میں پرانی دشمنی کی وجہ سے پیش آیا۔ پولیس نے مقدمہ درج کرکے ملزمان کی گرفتاری کے لیے کارروائی شروع کردی ہے۔