سلمان خان اپنی محبوبہ لولیا وینتر کے ہمراہ نئے گھر میں شفٹ ہوں گے

خان خاندان گلیگسی اپارٹمنٹ سے باندرہ کے لنکنگ روڈ پر واقع ’’لٹل اسٹار ‘‘نامی عمارت میں منتقل ہوجائے گا۔ فوٹو؛ فائل

---

بالی ووڈ کے دبنگ سپر اسٹار سلمان خان جلد ہی ممبئی میں واقع اپنے 40 سال پرانے گھر گلیگسی اپارٹمنٹ سے منتقل ہوجائیں گے۔

بالی ووڈ اسٹار سلمان خان اور ان کا خاندان 40 سال سے ممبئی کے گلیگسی اپارٹمنٹ میں مقیم ہے لیکن اب خان خاندان جلد ہی نئی عمارت میں منتقل ہو جائے گا جب کہ خان خاندان میں ارباز خان اور سہیل خان کے بچے بھی باندرہ میں الگ گھر میں رہتے ہیں جس کے بعد پوری خان فیملی نے ایک ساتھ رہنے کا فیصلہ کیا ہے۔

بھارتی میڈیا رپورٹس کے مطابق سلمان خان اور ان کا خاندان گلیگسی اپارٹمنٹ سے باندرہ کے لنکنگ روڈ پر واقع ''لٹل اسٹار ''نامی عمارت میں منتقل ہو جائے گا جب کہ خان فیملی نے پوری عمارت خرید کراس کی تزئین و آرائش بھی مکمل کرلی ہے جس کے بعد اب جلد ہی نئی بلڈنگ میں منتقل ہونے کا امکان ہے ۔

دوسری جانب میڈیا رپورٹس کے مطابق سلمان خان اور ماڈل گرل لولیا وینتر کی شادی بھی نئے گھر میں ہوگی جس کے لیے تیاریاں بھی جاری ہیں۔