اوگرا کا ایل پی جی ایئرمکس پلانٹس کی منظوری دینے سے انکار

کابینہ کی اقتصادی رابطہ کمیٹی سے منظوری ضروری ہے، درخواستوں پر اعتراضات

Irshad Ansari September 17, 2016

کابینہ کی اقتصادی رابطہ کمیٹی سے منظوری ضروری ہے، درخواستوں پر اعتراضات۔ فوٹو: فائل

اوگرا نے کابینہ کی اقتصادی رابطہ کمیٹی کی منظوری کے بغیرگیس کمپنیوں کوایل پی جی ایئرمکس پلانٹس لگانے کی منظوری دینے سے انکار کردیا۔

ایکسپریس کودستیاب دستاویز کے مطابق سوئی نادرن اور سوئی سدرن گیس کمپنی نے اوگرا سے ملک کے دوردراز اور پہاڑی علاقوں میں گیس کی سہولت فراہم کرنے کے لیے ایل پی جی ائیر مکس پلانٹس لگانے کی اجازت مانگی تھی۔ اوگرا کو دی جانیوالی درخواستوں میں 16 فروری 2016 کو مشترکہ مفادات کونسل کی جانب سے منظور کی جانیوالی ایل پی جی پالیسی کا بھی حوالہ دیا گیا۔

درخواستوں میں کہا گیا تھا کہ اوگرا دور دراز اور پہاڑی علاقوں میں ایل پی جی ائیر مکس پلانٹس لگانے اور گیس ٹیرف کی منظوری دے تاہم اوگرا نے دونوں گیس کمپنیوں کی درخواستوں پر اعتراض لگادیے ہیں اور کہا ہے کہ اس کے لیے کابینہ کی اقتصادی رابطہ کمیٹی کی منظوری ضروری ہے۔