مہمند ایجنسی خود کش حملے میں ہلاکتوں کی تعداد 36 ہو گئی علاقے میں کرفیو نافذ

خود کش حملہ آور کی شناخت کے لئے مبینہ بمبار کے جسم کے اعضا ہیڈ اسپتال منتقل کر دیئے گئے۔ فوٹو: آن لائن

---

گزشتہ روز تحصیل امبار میں ہونے والے خود کش حملے میں ہلاکتوں کی تعداد 36 ہو گئی جب کہ علاقے میں غیر معینہ مدت کے لئے کرفیو نافذ کردیا گیا ہے۔

ایکسپریس نیوز کے مطابق گزشتہ روز مہمند ایجنسی کے علاقے امبار کی مسجد میں ہونے والے خود کش حملے میں زخمی ہونے والے مزید 8 افراد جاں بحق ہو گئے ہیں جس کے بعد ہلاکتوں کی تعداد 36 ہو گئی ہے۔

اس خبر کو بھی پڑھیں: مہمند ایجنسی میں نماز جمعہ کے دوران خود کش حملہ

دوسری جانب مہمند ایجنسی کی تحصیل امبار میں غیر معینہ مدت کے لئے کرفیو نافذ کردیا گیا ہے اور سیکیورٹی فورسز نے علاقے میں سرچ آپریشن شروع کردیا ہے۔ امبار میں حملہ کرنے والے مبینہ خود کش بمبار کے جسم کے اعضا شناخت کے لئے تحصیل ہیڈ کواٹر اسپتال منتقل کر دیے گئے ہیں جب کہ ذرائع کا کہنا ہے کہ حملہ آور کی عمر تقریباً 20 سال کے قریب ہے۔