کراچی میں نامعلوم مسلح ملزمان سرکاری گاڑی چھین کر فرار

گاڑی ایئرپورٹ کے قریب چھینی گئی اور ملزمان ڈرائیور کو چھوڑ گئے، پولیس، فوٹو؛ فائل

---

ایئرپورٹ کے قریب نامعلوم مسلح ملزمان سرکاری گاڑی چھین کر فرار ہوگئے۔

ایکسپریس نیوز کےمطابق کراچی میں ایئرپورٹ کے نزدیک نامعلوم مسلح ملزمان اسلحہ کے زور پر سرکاری گاڑی چھین کر فرار ہوگئے۔ نمائندہ کےمطابق سرکاری افسر کا ڈرائیور اسے لینے ایئرپورٹ جارہا تھا کہ اس دوران قریب ہی نامعلوم مسلح ملزمان نے اس سے اسلحہ کے زور پر گاڑی چھینی اور فرار ہوگئے۔

پولیس کا کہنا ہےکہ مسلح ملزمان نے ڈرائیور کو چھوڑ دیا اور گاڑی لے کر فرار ہوگئے جب کہ چھینی گئی گاڑی کا نمبر جی ایس 6278 ہے جس کی تلاش شروع کردی گئی۔ پولیس کےمطابق گاڑی کو شہر میں دہشت گردی کےلیے استعمال کیے جانے کا بھی خدشہ ہے اس لیے عوام اس نمبر کی گاڑی دیکھتے ہی فوراً قانون نافذ کرنے والے اداروں کو اطلاع دیں۔