مریخ پر جانے کے 100 خواہشمندوں میں ایک پاکستانی بھی شامل

مریخ پر جانے کیلیے پاکستانی نے ون وے ٹکٹ کٹوا لی، 2 لاکھ خواہشمندوں میں سے 100 کا انتخاب ہوا جس میں واحد پاکستانی ریجنالڈ جارج بھی شامل ہے، 4 حتمی خلا بازوں کیلیے مقابلہ آئندہ سال ہوگا۔


ریجنالڈ جارج نے ایک ٹی وی سے گفتگو کرتے ہوئے کہا کہ پروجیکٹ کا نام مارس ون ہے، اس کیلیے درخواستیں مانگی گئیں تو انھوں نے بھی درخواست دی، اس وقت دنیا بھر سے 2 لاکھ امیدوار تھے، 2 سال میں مختلف مراحل سے گزرتے گزرتے اب 100 امیدوار رہ گئے، وہ واحد پاکستانی ہیں اور آپ کی دعائیں ہوں گی تو وہ پہلے 4 میں بھی ہوں گے۔

ان کا کہنا تھا کہ وہ پہلے مشن کمانڈر ہوں گے اور پہلے انسان ہوں گے جو مریخ پر قدم رکھیں گے، اس وقت کوئی ایسا ذریعہ نہیں کہ کوئی مریخ سے واپس آ سکے، اس کو ہم ون وے ٹرپ کہتے ہیں، اس کا مطلب ہے جو وہاں جائے گا وہ واپس نہیں آئے گا، ریجنالڈ کا یہ بھی کہنا ہے کہ وہ مریخ پر جا کر پاکستان کا نام روشن کرنا چاہتے ہیں۔