پاکستانی اداکار فواد خان پر بھارتی زمین تنگ ہونے لگی

بھارتی صحافی نے فواد خان سے بھارت چھوڑنے اور بالی ووڈ میں پاکستانی اداکاروں کے بائیکاٹ کا مطالبہ کردیا۔ فوٹو؛ فائل

---

بھارتی صحافی اور معروف بلاگر سومیادپتا بینر جی نے پاکستانی اداکار فواد خان کو بھارت چھوڑنے کی دھمکی دیتے ہوئے فلم نگری سے ان کے بائیکاٹ کا مطالبہ کیا ہے۔

پاکستانی اداکاروں اور گلوکاروں کو کسی بھی عام سے واقعے کو بنیاد بنا کرتذلیل کرنا بھارت کا وطیرہ بن چکا ہے لیکن اب مقبوضہ کشمیر میں غاصب بھارتی فوجی اڈے پر حملے کے بعد پاکستانی اداکار فواد خان بھی انتہا پسندوں کا ہدف بن چکے ہیں اور انہیں بھارت چھوڑنے کی دھمکیاں دی جارہی ہیں۔

بھارتی صحافی اور معروف بلاگر سومیادپتا بینر جی نے پاکستانی اداکار فواد خان کے نام ایک کھلا خط لکھا ہے جس میں اداکار سمیت تمام پاکستانی اداکاروں کو بھارت چھوڑنے کا کہتے ہوئے بالی ووڈ سے بھی پاکستانی اداکاروں کے بائیکاٹ کا مطالبہ کیا گیا ہے۔ بھارتی صحافی کا کہنا تھا کہ فواد پر چند سالوں میں ہم نے بہت محبت نچھاور کی ہے جس سے کسی صورت انکار نہیں کرسکتے لیکن موجودہ کشیدگی میں فواد نے خود کو الگ رکھا ہے لہٰذا ڈیئر فواد اب وقت ہے کہ آپ اپنے وطن واپس لوٹ جائیں۔

واضح رہے کہ ہندو انتہا پسندوں نے اس سے قبل بھی استاد غلام علی ،راحت فتح علی خان سمیت کئی اداکاروں اور گلوکاروں کو دھمکیاں دی ہیں۔