بدتمیزکرکٹرزکوسبق سکھانے کا نیا طریقہ متعارف

سرزنش اور جرمانے کے ساتھ اب پوائنٹس سسٹم بھی لاگو ہوگا، آئی سی سی

Sports Desk September 23, 2016

باربار قوانین کی خلاف ورزی کرنے والے کھلاڑیوں کو معطل کردیا جائے گا فوٹو؛ فائل

آئی سی سی نے بدتمیز کرکٹرز کو سبق سکھانے کا نیا طریقہ ڈھونڈ لیا، سرزنش اور جرمانے کے ساتھ اب پوائنٹس سسٹم بھی لاگو ہوگا،باربار قوانین کی خلاف ورزی کرنے والے کو معطل کردیا جائے گا۔

نئے کوڈ آف کنڈکٹ اور ڈی آر ایس کے بارے میں امپائرز کال میں تبدیلی کا جمعرات سے اطلاق ہوگیا۔ تفصیلات کے مطابق انٹرنیشنل کرکٹ کونسل نے پلیئرز اور سپورٹنگ اسٹاف سے متعلق کوڈ آف کنڈکٹ اور ایل بی ڈبلیو سے متعلق ڈی آر ایس کے تحت امپائرز کال میں ردوبدل کا عالمی کرکٹ میں جمعرات سے نفاذ کردیا۔کوڈ آف کنڈکٹ کی فہرست میں کسی نئے جرم کا اضافہ یا سرزنش، جرمانے اور معطلی کی سزائوں میں بھی کوئی اضافہ نہیں کیا گیا، مگر جو کھلاڑی قوانین کی خلاف ورزی میں ملوث رہتے ہیں ان کے لیے ایک خصوصی پوائنٹس سسٹم لاگو کیا گیا ہے۔

ہر بار جرم پر کچھ پوائنٹس پلیئر کے نام کے آگے جڑکر دو برس تک اس کے ساتھ رہیں گے،مخصوص تعداد تک پہنچنے کی صورت میں پلیئر کو اگلے مقابلے کیلیے معطل کردیا جائے گا، اس طریقہ کارکے نفاد کے ساتھ ہی تمام انٹرنیشنل کھلاڑیوں کا کھاتہ زیرو سے اسٹارٹ ہوچکا ہے۔اسی طرح ڈی آر ایس کی نئی پلیئنگ کنڈیشنز کا بھی اطلاق کردیا گیا جو ایل بی ڈبلیو سے متعلق امپائرز کال کے حوالے سے ہیں۔

اس سلسلے میں تھرڈ امپائر کو فیلڈ آفیشل کا ناٹ آئوٹ قرار دیے جانے کا فیصلہ تبدیل کرنے کیلیے کچھ مزید ناپ تول کرنا پڑے گی، اب آئوٹ سائیڈ آف اور لیگ اسٹمپس کوکم از کم آدھی گیند چھوتی ہوئی دکھائی دینی چاہیے، اسی طرح بیلز یا اس سے نیچے بھی آدھی گیند کے ہٹ کرنے کے شواہد موجود ہونے چاہئیں، چونکہ بھارت ڈی آر ایس سسٹم کے خلاف ہے، اس لیے نیوزی لینڈ سے سیریز میں ٹیکنالوجی استعمال نہیں ہورہی، اس امپائرز کال کا اطلاق اتوار کوبینونی میں جنوبی افریقہ اور آئرلینڈ کے درمیان واحد ون ڈے میچ سے ہوگا۔