سری نگر میں سکون نہیں تو دلی میں بھی چین نہیں ہو سکتا پرویز رشید

وفاقی وزیر اطلاعات و نشریات پرویز رشید کا کہنا ہے کہ بھارت مقبوضہ کشمیر میں ظلم و جبر کر رہا ہے اور اگر سری نگر میں سکون نہیں ہے تو نئی دلی میں بھی چین نہیں ہو سکتا۔

لاہور میں میڈیا سے بات کرتے ہوئے پرویز رشید کا کہنا تھا کہ بھارتی وزیراعظم ہمیں تنہا کرنے کی باتیں کر رہے ہیں لیکن دنیا میں ظلم کرنےوالا تنہا ہوتا ہے اور بھارت مقبوضہ کشمیر میں مسلسل ظلم و ستم کر رہا ہے۔ ان کا کہنا تھا کہ بھارت کشمیریوں کے غصے کو ٹھنڈا کرے اور مقبوضہ کشمیر میں اپنی ذمہ داریاں پوری کرے، اگر سری نگر میں چین نہیں ہو گا تو نئی دلی میں بھی چین نہیں ہوگا۔


اس خبر کو بھی پڑھیں: عمران خان سیاسی گناہگاروں کا ہجوم لیکر بے گناہوں پر حملہ کرناچاہتے ہیں

پاکستان تحریک انصاف کے رائیونڈ مارچ کے حوالے سے پوچھے گئے سوال پر پرویز رشید کا کہنا تھا کہ عمران خان 30 ستمبر کو رائیونڈ میں میلا سجائیں گے اور اکتوبر میں خالی ٹھیلا۔ انھوں نے کہا کہ اپنی سیاست اور سیاسی جماعت کا بیڑہ غرق کرنے کا جو ہنر عمران خان کے پاس ہے وہ کسی کے پاس نہیں۔