برصغیرکے ناموراداکار دلیپ کمار90برس کے ہوگئے  

لیجنڈ اداکار دلیپ کمار کی بیوی سائرہ بانو نے اپنے شوہر کی علالت کے سبب سالگرہ نہ منانے کا فیصلہ کیا ہے۔.فوٹو : فائل

---

برصغیر کے نامور اداکار دلیپ کمار90 برس کے ہوگئے۔ خیبر پختونخوا کی ''دی کلچرل ہیریٹیج فاؤنڈیشن'' کے زیراہتمام ان کی سالگرہ منائی گئی۔

بر صغیر باکس آفس لیجنڈ دلیپ کمار پاکستان کے صوبے خیبر پختونخوا کے دارالحکومت پشاور سے ہجرت کر کے بھارت گئے تھے، ان کا اصل نام محمد یوسف خان ہے لیکن دنیائے فلم میں وہ دلیپ کمار کے شہرت رکھتے ہیں۔ دی کلچرل ہیریٹیج فاؤنڈیشن کے کارکن جتن ڈیسائی نے بتایا کہ اس سلسلے میں متعلقہ شعبے کی نمایاں شخصیات سمیت صحافیوں، وکیلوں، امن کے نمائندوں اور دیگر افراد کو دعوت نامے بھجوا دیئے گئے ہیں۔ مزید براں صوبائی انتظامیہ نے حال ہی میں نہ صرف عظیم دلیپ کمار بلکہ راج کپور کے بھی آبائی گھرکو قومی ورثے کے طور پر محفوظ کرنے کا منصوبہ بنایا ہے۔

بھارتی سلور اسکرین پر حکمرانی کرنے والے اور بھی کئی ستاروں کا تعلق پاکستان بالخصوص پشاور سے ہے۔ مقامی لوگوں نے مطالبہ کیا ہے کہ پشاور کے بعض علاقوں کو ان عالمگیر شہرت کی حامل شخصیات کے ناموں سے موسوم کیا جائے۔ دریں اثنا لیجنڈ اداکار دلیپ کمار کی بیوی سائرہ بانو نے اپنے شوہر کی علالت کے سبب سالگرہ نہ منانے کا فیصلہ کیا ہے۔