تھالی کے بینگن

تھالی کے بینگن کی کئی اقسام ہیں جو دنیا بھر میں پائی جاتی ہیں۔ ان سب کا رنگ نسل اور بود و باش مختلف ہے لیکن فطرت میں یہ سب ایک دوسرے کا پر تو ہیں یعنی 'صرف میں اور میرا نفع'۔ ان میں سے ہم چیدہ چیدہ اقسام کا جائزہ لیتے ہیں۔

یہ قومی بھی ہوتے ہیں اور بین الاقوامی بھی۔ آپ انٹرنیشنل تھالی کو سامنے رکھ کر کچھ ممالک کی خارجہ پالیسی کا جائزہ لیں تو یہ اوصاف حمیدہ خود بخود سامنے آجائیں گے کہ جہاں بھیڑ دیکھی اس کیمپ کا حصہ بن گئے، بعد میں اسی کیمپ کی مخالفت میں زمین آسمان ایک کردیئے۔ جس ملک کی اجتماعی بربادی میں حصہ لیا بعد میں اسی کے لئے مگرمچھ کے آنسو بہا دیئے۔ کبھی نسل پرستی کا لبادہ اوڑھ لیا تو کبھی انسانی حقوق کے علمبردار بن گئے۔ کچھ قوموں کیلئے جمہوریت کا ڈھول پیٹتے رہے اور کہیں بدترین آمریت مسلط کروادی، جو پہلے دوست تھے بعد میں دشمن قرار پائے۔ کسی کے تیل پر لڑھک گئے تو کہیں وہی تیل آنکھوں میں کھٹک گیا۔ اس کی ایک واضح مثال اقوام متحدہ کی کارکردگی ہے، جو جنگوں اور تنازعات کے موقع پر اکثریت کی طرف لڑھکنا ضروری سجھتی ہے پھر چاہے اقلیت کتنی ہی مظلوم کیوں نہ ہو اسکی دلجوئی اوراشک شوئی بس کاغذوں تک محدود رہ جاتی ہے۔ دوسری مثال پاکستان اور بھارت کے معاملے میں امریکا کی پالیسی ہے کہ جب بھارت کے مہمان یا میزبان بنے تو وہی کہا جو دنیا کی سب سے بڑی جمہوریت کو خوش کرسکے جب پاکستان کی جانب رخ کیا تو الفاظ، لہجہ اور بیانیہ بدل دیا۔

قومی سطح کی سیاسی تھالیوں کا جائزہ لیں تو یہ بیگن ہمارے یہاں سب سے زیادہ عام ہیں اور کثرت سے پائے جاتے ہیں۔ یہ اکثر طاقت کے ایوانوں میں براجمان رہتے ہیں جبکہ باہر بیٹھ کر بھی تھالی کا بیلنس آؤٹ کرنے کی بھرپور طاقت رکھتے ہیں۔ کسی بھی سیاسی تحریک کی کامیابی اور ناکامی بھی ان ہی کی مرہون منت ہوتی ہے کیونکہ یہ اکثرعین موقع پر اپنی عادت سے مجبور ہو کر سائیڈ بدل لیتے ہیں۔ یہ آج یہاں تو کل وہاں ہوتے ہیں۔ ضروری نہیں کہ یہ صبح جس کے نام پر دھمال ڈال رہے ہوں شام کو بھی اس کے صدقے واری اسی شدت سے جائیں۔ یہ موسم اور ہوا کا رخ بھی خوب پہچانتے ہیں۔ اس لئے ذاتی فائدہ کے رخ پر سورج مکھی کے پھول کی طرح کھڑے رہتے ہیں۔ یوں تو دنیا میں ہر چیز کا زوال لازم ہے لیکن ہمارے ملک میں ان کا عروج ہمیشہ ہی رہتا ہے یقین نہیں آتا تو کچھ سیاسی لوگوں کے ماضی اور حال پر نظر ڈال لیں۔

ایسے بینگن بہت چالاک ہوتے ہیں، ان کی سمجھ بوجھ کتنی ہی محدود کیوں نہ ہو لڑھک جانے کی صلاحیت لامحدود ہوتی ہے۔ ان کی سوچ اپنا نفع نقصان دیکھ کر پنپتی ہے لہذا انتہائی ناقابل اعتبار ساتھی ثابت ہوتے ہیں۔ انہی میں سے کچھ پھرتی اور قلابازی کی اوج کمال تک پہنچ کر اپنا لقب بدل ڈالتے ہیں۔ اب وہ تھالی کے محدود دائرہ سے باہر آکر سیاسی کہکشاں کی وسعتوں کو کھوجنا شروع کردیتے ہیں۔ انہیں عرف عام میں جو کہا جاتا ہے ہم اس کی بحث میں نہیں پڑیںگے صرف یہ کہیں گے کہ عام دنوں میں یہ بیان بازی کی حد تک رہتے ہیں لیکن الیکشن سے پہلے اپنے جلوے بار بار بکھیر کر اپنا ریٹ اونچا کرنا شروع کردیتے ہیں، باقی آپ خود سمجھ دار ہیں۔